Rokstu sagataveja: portals lakuga.lv

Latgalīšu volūda i Latgolys kulturys atspīgeļuošona jau seņ ir ījāmuse zeimeigu vītu Latgolys regionaluos televizejis (LRT) darbeibā. Latgalīšu volūda ziņu saturā pasaruoda caur reportažom i intervejom, kai ari speciali veiduotajūs raidejumūs i cytūs medeju projektūs. LRT turpynoj veiduot saturu, kas izceļ Latgolys cylvākus, nūtikšonys i kulturys montuojumu, reizē styprynojūt latgalīšu volūdys byušonu kluotyn myusu dīnu medeju ainovā.

Nu maja beigu Latgolys regionaluos televizejis Facebook lopā ir īkļauti i iz prīšku byus radzami sižeti latgalīšu volūdā par Vaļsts kulturkapitala fonda mierkprogramys “Latvīšu viesturyskūs zemu atteisteibys programa” finansiali atbaļsteitajim projektim. Da ituo gods beigu kūpā tiks sataiseiti 20 stuosti par projektim i tūs eistynuotuojim. Pyrmī stuosti jau ir izskaniejuši. Vīns nu taidu beja par aktivitatem Rēzeknis nūvoda Rogovkā – 15. tautys muzykantu saītu-večerinku “O, bļaka!”. Izskanēja ari stuosti par meistarklasem ar muola gleznom, kai ari stuosts par gleznuošonys plenera “Valdis Bušs” izstuodi i cyti.

Stuosti latgalīšu volūdā teik veiduoti kai daļa nu projekta “Latgolys kultura = identitate, volūda, jaunrade TV ekranā VIII”. Itys projekts koncentrejās iz Latgolys unikaluo rakstura i ituo viesturyskuo regiona kulturys daudzveideibys saglobuošonu, izplateišonu i veicynuošonu, sistematiski dokumentejūt i translejūt kulturys nūtikšonys, taidā veidā palelynojūt tūs radzameibu i ītekmi. Mierkis ir izraiseit sabīdreibys interesi, rodūt leluoku byušonys kluotyn sajiutu cylvākim konkretajūs kulturys pasuokumūs, tymā pošā laikā ari informejūt i izgleitojūt skateituojus par kulturys iniciativom, īsaisteitajim cylvākim, mierkim i lobumim, vysaidom rodūšom aktivitatem.

Jau vaira nakai septeņus godus Latgolys regionaluo televizeja veidoj viests i raidejumus ar Latgolys programys finansialu atbolstu. Tuos regularajā saturā ir segmenti par latgalīšu volūdā prezentātim kulturys pasuokumim, apgiunūt plašu koncertu, sapuļču, seminaru, gruomotu izdūšonu, rodūšūs ceņtīnu i cytu nūtikšonu lūku vysā regionā.

LRT veidoj ari raidejumu cyklu “Latgales pūra lāde – atdzimšana II” par senejūs latgalīšu tradiceju īdzeivynuošonu, kulturys montuojuma atjaunuošonu i saglobuošonu Latgolā. Kotrā raidejumā byus atspīgeļuoti pīmāri, kai senejuos tradicejis teik atdzeivynuotys kasdīnys vidē, pīmāram, unikaluos zvejis tradicejis Īdeņā, Zvejnīku svātki Nagļūs, tiks apsavārtys ari kopusvātku, maja dzīduojumu, restauracejis i cytys tradicejis Latgolā.

Latgolys regionaluos televizejis miseja namaineigai ir palykuse viesteit par svareiguokajom i nūzeimeiguokajom nūtikšonom Latgolā i īpazeistynuot skateituojus ar regiona personeibom, tradicejom, kulturys dzeivi i aktualajom nūzarem. Taišni itei televizeja vysuvaira laika i spāka veļtej aktivai latgalīšu volūdys i kulturys populariziešonai.