Rokstu sagataveja: portals lakuga.lv

Latgolys regionaluo televizeja (LRT) turpynoj raidejumu cykla “Latgales pūra lāde – atdzimšana II” veiduošonu, kas ir turpynuojums pārņ eistynuotajam projektam. Skateituoji turpynuos īpazeit Latgolys kulturys montuojumu, senejuos tradicejis i cylvākus, kuri tuos sagloboj i nūdūd paaudzem iz prīšku. Projekta laikā tiks sataiseiti vēļ diveji televizejis raidejumi, kurūs atspīgeļuos senejūs tradiceju atjaunuošonu, tūs eistynuotuojus i nūzeimi myusu dīnu sabīdreibā, reizē skaidrojūt ari itūs tradiceju viesturyskū izaceļšonu i skotu iz prīšku.

Ūtrais raidejums byus veļteits maja dzīduojumu tradicejai pi cīmu krystu Latgolā – senejai goreiguo i kulturys montuojuma tradicejai, kas vys vēļ ir dzeiva i nūzeimeiga vītejim cylvākim. Maja vokorūs ļauds puļcejās pi krystu, kab kūpā lyugtūs, skaiteitu rūžukrūni i dzīduotu dzīsmis Dīva muotis gūdam.

Raidejumā skateituoji īpazeis ari maja dīvakolpuojumu viesturi, tūs nūzeimi Latgolys kulturtelpā i izzynuos, kai itei tradiceja teik saglobuota myusu dīnuos. Sovūs stuostūs i pīredzē daleisīs tradicejis kūpiejis Ināra Blinova i Natālija Ugaine, maja dzīduojumu pietneica Ruta Cibule, kai ari prīsters Rinalds Stankēvičs. Tiks atkluotys ari eipašys tradicejis niansis – krystu kūpšona, kūpeiga dzīduošona i lyugšonuos, kai ari senejūs “značku” ci eipašu aizdavumu viļkšona.

Taipat raidejumā tiks atkluota ari kopusvātku tradiceja Latgolā – laiks, kod saimis i rodi puļcejās kopūs, sakūp tyvinīku atdusys vītys, kūpā lyudzās i pīmiņ aizguojiejus. Vītejī dzeivuotuoji pasadaleis atmiņuos par tū, kai kopusvātki svieteiti agruok i kai tradiceja puorsamejuse, reizē saglobojūt sovu nūzeimi kai dzymtu sasatikšonys, pīminis i paaudžu saiknis styprynuošonys nūtikšona. #SIF_MAF2026

Ūtrais raidejums tiks puorraideits kanalā TV24 29. augustā 16 stuņdēs ar atkuortuojumu 30. augustā 10.30 i 20.30 stuņdēs, kai ari 31. augustā 17.30 stuņdēs ReTV kanala vierszemis apraidē Latgolys regionalajā televizejā. Taipat raidejumus var atrast LRT sātyslopā, kai ari vītnēs Facebook, YouTube i platformā xtv.lv.

Raidejuma veiduotuoji gaideis ari jiusu atsauksmis i īsacejumus viestulēs pa postu, adrese: Rēzekne, Piļs īla 4, LV-4601 ar nūruodi Latgolys regionalajai televizejai voi LRT socialūs medeju lopuos, kai ari e-postā lrt.zinas@inbox.lv voi zvonūt/rokstūt iz telefona numeri 26339536.

Projektu finansej Medeju atbolsta fonds nu Latvejis vaļsts budžeta leidzekļu. Par raidejumu cykla “Latgales pūra lāde – atdzimšana II” saturu atbiļd SIA “Latgales reģionālā televīzija”. #SIF_MAF2026

Publikaceju apmoksoj Latgolys regionaluo televizeja