Rokstu sagataveja: portals lakuga.lv

Kluotyn pyrmuo rudiņa nedeļa. Itūreiz īsacejumus, kas naļaun atsavadeišonai nu vosorys byut skumeigai, sagatavejuse zeimyna “radasamanta” autore Samanta Stepiņa. Jei pīduovoj breineigus padūmus rudiņa sagaideišonai.

Kotram pīdzeivuojumam vajadzeiga “loba dagvīla”

Kotrys lobs pīdzeivuojums suocās ar nazkū gordu jimšonai leidza. Muns ituos vosorys pīdzeivuojums ir vīgli pagatavejamuo bananmaize piec “Našķoties Zane” receptis. Gorda i cīši ārtai pajamama leidza kai velobraucīnī, tai ari nalelā izbraucīnī voi pastaigā pi dobys. Bananmaizi sagatavejam sātā īprīškejā vokorā, bet nu reita pyrma laisšonuos ceļā pīstuojam tepat Rēzeknē, dizaina veikalā “Kabata”, kur pagiunam “KUUP” kopeju voi kakavu i baudom tū iz vītys voi jamam leidza. “Kabata” ītūvosor ir palykuse par vīnu nu munu meiluokūs vītu Rēzeknē – i lai atītu iz “sarunom pi kopeja”, i ari vīnkuorši īsadvasmuotu i apsavārtu vītejūs zeimynu dorbus. I tod jau tik atlīk izavielēt, kur dūtīs.

Braucīņs ar velo apleik Rāznys azaram

Ka gribīs vosoru nūslēgt aktivai, muns īsacejums ir kuopt iz velosipeda i laistīs apleik Rāznys azaram. Suocūt braucīni nu Rēzeknis, kūpā saīt ap 80 kilometru, bet maršrutu mīreigi var ari pīlāguot sovom īspiejom i nūskaņuojumam – braucūt tikai apleik Rāznai, tī byus kaidi 40 kilometri. Velobraucīni ir munā gaumē – tys ir laiks sev, vareiba baudeit Latgolys dobys ainovys, svaigs gaiss, aktivi pavadeits laiks i breineigs nūskaņuojums, kura pīteik vēļ nedeļai iz prīšku.

Laistīs Lubuona vierzīnī

Ka 80 kilometri iz velosipeda itūreiz nauzrunoj, var laistīs mīreiguokā pīdzeivuojumā iz Teirumnīku pūra stygu i tai tuoļuok Lubuona azara vierzīnī. Itys maršruts maņ eipaši pateik rudinī i agrā pavasarī. Izstaiguot pūra stygu, nūstuot pi azara, pajimt leidza termosu i bananmaizi, nasasteigt i vīnkuorši pasavērt apleik. Izaklausa piec loba vosorys nūslāguma plāna, tai?

Vosorys beigys ir tei šaļts, kod doba jau pamozam mainuos i ari putyni suoc gataveitīs laistīs paceli. Pīluodejam sevi ar gordumim, nūīmam puora tyukstūšu sūļu svaigā gaisā i puorlīcynūši īsūļojam septembrī. Rudiņs piec aktivys vosorys ruodīs patīsi skaists i nazkai ari eipaši mīra pylns, tai?