Rokstu sagataveja: portals lakuga.lv

9. oktobrī Preiļūs, kai ari 16. oktobrī Rēzeknē i Preiļu kulturys nomā gaidomys nūtikšonys par gūdu izcyluo latvīšu komponista, Latgolys kulturys personeibys Juoņa Ivanova 120. dzimšonys dīnai. Sovpus nacionaluo īrokstu kompaneja “SKANi” izdavuse jaunu albumu “LNSO. Ivanovs. Simfonijas Nr. 19. un 21.”, kurū īskaņuojs Latvejis Nacionalais simfoniskais orkestris dirigenta Gunta Kuzmys vadeibā.

Juoņs Ivanovs (1906–1983) ir vīna nu nūzeimeiguokūs personeibu Latvejis akademiskuos muzykys viesturē. Juo rodūšais montuojums ir cīši saisteits ar Latgolu, tuos dobu, ļaudim i kulturtelpu. Komponista dailradē sasavyn laikmata pīredze, personiskī puordzeivuojumi i sovpateigs muzykalais rūkroksts, kas juo radeitajim skaņdorbim daškir eipašu vītu Latvejis kulturys montuojumā.

Pīminis šaļts i izstuodis atkluošona

9. oktobrī 16 stuņdēs Preiļu kulturys noma lelajā zālē gaidoma muokslineicys Diānys Īvis, kura ir Juoņa Ivanova mozmeita, gleznu izstuodis “Latgale” atkluošona. Sovpus 17 stuņdēs Preiļu Muzykys i muokslys školys (PMMŠ) koncertzālē gaidoma pīminis šaļts i vareiba sasatikt ar muokslineicu Diānu Īvi. Skanēs Juoņa Ivanova vokaluo i instrumentaluo kamermuzyka PMMŠ pedagogu Ilzis Savickys, Zitys Barševskys i Kristinys Abdulvahidys izpiļdejumā, ka ari byus 9. jaundorbu konkursa muzykā i muokslā laureatu paviesteišona.

Pasuokums vysys dīnys garumā Rēzeknē

16. oktobrī MIKC “Latgolys Muzykys i muokslys vydsškola” (LMMV) aicynoj iz pasuokumu vysys dīnys garumā, kurā varēs īpazeit Juoņa Ivanova dzeivis i dailradis aspektus nu Latgolys kulturys dzeivis 20. godu symta pyrmuos pusis da komponista personeibys, laikabīdru viertiejuma i juo muzykalūs interpretaceju myusu dīnuos.

Pasuokuma īvodā viesturnīks Vladislavs Malahovskis runuos par Latgolys sovpateibu i kulturys dzeivi 20. godu symta pyrmajā pusē. Sovpus Juoņa Ivanova muzykys vydsškolys 4. kursa audziekni sovā prezentacejā īpazeistynuos ar Juoņa Ivanova dzeivi i dailradi.

Eipaša vīta dīnys nūtikšonu programā ir lekcejai “Juoņs Ivanovs. Teksti i zemteksti”, kurā Iveta Grunde i Andris Vecumnieks dagrīzs viereibu komponista rodūšajam montuojuma i tuo kontekstam. Sovpus Ilze Medne apsavērs Juoņa Ivanova personeibys atspīgeļuojumu laikabīdru vāruojumūs i muziku atziņuos.

Sovpus dīnys nūslāgumā paradzāts koncerts ar Juoņa Ivanova muzyku, kurā pīsadaleis MIKC LMMV audziekni, Juoņa Ivanova Rēzeknis muzykys vydsškolys kors i pianists Rihards Plešanovs.

Pasuokumā pedagogim byus vareiba pylnveiduot profesionaluos kompetencis – par daleibu jī sajims pedagogu profesionaluos kompetencis pylnveidis kursu “Jānis Ivanovs – personība, laikmets un radošais mantojums” aplīceibu deveņu stuņžu apmārā.

Daleiba pasuokumā ir bez moksys, tok ir juodasasoka da 12. oktobra aizpyldūt anketu ITE.

Dīnys programa

10.00–10.20
“Latgolys sovpateiba i kulturys dzeive (20. g. s. pyrmuo puse)”
Vladislavs Malahovskis

10.30–10.50
Prezentaceja par Juoņa Ivanova dzeivi i dailradi
MIKC LMMV JIRMS 4. kursa audziekni

11.00–13.00
“Juoņs Ivanovs. Teksti i zemteksti”
Iveta Grunde i Andris Vecumnieks

13.00–14.00
Pušdīņu puortraukums

14.00–14.45
“Juoņa Ivanova personeibys meti laikabīdru vāruojumūs i muziku atziņuos”
Ilze Medne

15.00–16.00
Koncerts. Pīsadola MIKC LMMV audziekni, pianists Rihards Plešanovs, JIRMS kors i JIRMS meiteņu kors.

Koncerts Preiļūs

Sovpus 18 stuņdēs vokorā Preiļu kulturys nomā turpynuosīs Juoņa Ivanova 120. jubilejai veļteituo programa ar koncertu “Juoņa Ivanova simfoniskuo muzyka”. Koncerta solists byus Vestards Šimkus, dirigents Juoņs Stafeckis, pīsadaleis Vaļsts kamerorkestris “Simfonietta Rīga”. Īīšona bez moksys.

Jauns muzykys albums “LNSO. Ivanovs. Simfonijas Nr. 19. un 21.”

Nacionaluo īrokstu kompaneja “SKANi” izdavuse jaunu albumu “LNSO. Ivanovs. Simfonijas Nr. 19. un 21.”, kurū īskaņuojs Latvejis Nacionalais simfoniskais orkestris dirigenta Gunta Kuzmys vadeibā. Albumā ītvarta komponista Juoņa Ivanova 19. simfoneja (1979) i napabeigtuo 21. simfoneja (1983), turpynojojūt “SKANi” izdūtū sereju.

Juoņa Ivanova myužs i tymā padareitais i vīna nu spūdruokūs i stypruokūs puslopu vys vēļ napīraksteitajā latvīšu muzykys viesturē. Juo dorbu sarokstā ir 21 simfoneja, simfoniskuos miniaturys, koncerti vejūlei, čellam i klavīrem, instrumentaluo kamermuzyka, solodzīsmis, klavīrdorbi i vērtine vokaližu koram a capella. Juo nazkodejais students Juris Karlsons, kurs absolvēja Ivanova kompozicejis klasi 1972. godā soka: “Nazynu ūtra latvīšu komponista, kuram byutu tik spieceiga, dramatiska muzyka. Muzyka, kurā ir treis konfliktu styuri – liktiņs, ticeiba i ceiņa. I ari cīši veriškeiga romantika. Syurums, kas nav gauduleigs.” Sovpus Līpuojis koncertzālis “Lielais Dzintars” muokslinīcyskais vadeituojs i muzykologs Orests Silabriedis komentej: “Juoņa Ivanova mārūgs ir gryuši apgiunams i vēļ gryutuok aprokstoms.”

Albums daīmams Spotify i Apple Music, taipoš ari kompaktdiska formatā.