Rokstu sagataveja: portals lakuga.lv

Video formatā niu īspiejams īpasazeit ar septembrī Bieržgaļa Svātuos Annys Romys katuoļu bazneicā pyrmatskaņuotū Laurys Ivanovys jaundorbu “Mōras zemē” ar Ontona Rupaiņa vuordim, kas veļteits juo 120. jubilejai i Bieržgaļa bazneicys 250 godu jubilejai.

Skaņdorbu “Mōras zemē” izpylda Ilze Grēvele-Skaraine (soprans), Laura Ivanova (varganis) i Leņdžu pogosta kulturys noma sīvīšu vokalais ansamblis “Rūžeņas”. Kompozicejis muzykys autore ir Laura Ivanova, vuordu autors – Ontons Rupaiņs. Skaņdorbs radeits, pasasokūt Rēzeknis nūvoda pošvaļdeibys “Rodūšūs dorbu konkursa” atbolstam. Video fiļmēja i apstruoduoja Ritvars Pujāts.

Laura Ivanova pīzeist, ka jei komponej reši. Kasdīnā jei bīžuok sasadur ar apdaru veiduošonu vokalajim ansamblim, puorlykumim ci aranžeju veiduošonu vargaņu muzykai, deļtuo originalmuzykys radeišona beja izaicynuojums ari jai pošai. Ari ar Ontona Rupaiņa tekstim Laura struoduoja pyrmū reizi, koč ari ar juo montuojumu beja pazeistama jau nu školys laiku.

Laura stuosta, ka itys projekts beja vareiba papieteit seikuok i īsadzilinuot: “Vyss suocēs pavasarī, kod Bieržgaļa muzeja vadeituoja Skaidreite Apeināne uzaicynuoja mani ar vokalisti Ilzi Grēveli-Skaraini uzastuot Ontona Rupaiņa i Bieržgaļa bazneicys jubilejā. Tūreiz es vēļ švuorbuojūs, kai veiduot programu – varbyut ar klavīrem, kam iz tū šaļti mums jau beja koncertprograma dīvnomim taišni ar klavīrem i bolsu. Vystik gribiejuos, lai skaņdorbs byutu ar varganem, ari Bieržgaļa bazneica ir tei vīta, kur es pyrmū reizi sasapazynu ar varganem. Niulejais instruments Bieržgaļa bazneicā vaira naskaņ, tok jau tūlaik roduos plāns, ka es varātu atvest digitaluos varganis. Itys nūtykums maņ beja eipašs i personiskys, kam poša asu dzymuse i auguse Bieržgalī, taipoš itei ir muna bazneica, kurā asu kristeita, lauluota i kur kristeiti muni bārni. Vys repertuara nimoz nav tik daudzi. Vīnu ar Rupaiņa tekstu, kas jau beja īprīšk radeita, mes atrodom i izpiļdejom, tū ir komponējs Ingars Gusāns i Guntra Kuzmina-Jukna. Tok gribiejuos radeit nazkū eipašu, ari pats Ontons Rupaiņs vysu sovu dzeivi ir veļtejs, kab nazkū saglobobuotu, voi tys byutu teatris, volūda voi folklora, sovys zemis stuostus i stuostus par sovim cylvākim, par speiti tam, ka dzeive jū vede vys tuoļuok nu dzymtuos zemis. Tai roduos ideja veiduot sovu skaņdorbu, kas byutu pīmāruots pasuokumam – ar Rupaiņa vuordim, tok byutu ari deļ vargaņu i solistu. Tai kai es poša vodu vokalūs ansambļus, tod gribiejuos īsaisteit ari tūs. Es pieteju dzejūļus, i taišni “Mōras zemē” maņ ruodejuos cīši pīmāruots. Suokumā vys stypri švuorbuojūs, voi maņ tys izadūs i kai tys byus, tok tikū beja atrosts eistais teksts, melodeja atguoja saleidzynūši dreiži i vīgli,” doluos komponiste Laura Ivanova.