Rokstu sagataveja: portals lakuga.lv

Tikū suocīs novembris, kas ir trešais rudiņa mieness. Itūgod rudiņs prīcynoj ar vysā lobu laiku i, turpynojūt tradiceju pīduovuot ari godalaikim veļteitys dzīšmu izlasis, portals lakuga.lv rudiņa sajiutys aicynoj nūgiut ari desmit dzīsmēs, kuruos īsaskaņ rudiņa notys. Pyrmū reizi rudiņam veļteita dzīšmu izlase publicāta 2018. godā – jū var nūsaklauseit ITE.

1. Folklorys kūpa “Upīte” i Renārs Kaupers – “Jau rudens atnuoce”

Dzīsme nu 2020. godā izdūtuo folklorys kūpys albuma “Padzīdam i…”.

2. Rēzeknis nūvoda vokaluo studeja “Skonai” – “Rūžu duorzi”

Dzīsmis “Rūžu duorzi” muzykys autore ir “Skonai” vadeituoja Guntra Kuzmina-Jukna, bet teksta pamatā ir Ilzis Spergys dzejūļs. Videoklipā īmyužynuots Lūznovys muižys parka zalta rudiņa kruosu spūdrums. Vaira ap dzīsmi var izzynuot ITE.

3. Postfolklorys grupa “Rikši” – “Rudiņs”

Dzīsme nu 2020. godā izdūtuo postfolklorys grupys albuma “Trīp!”.

4. Sovvaļnīks – “Izmyrušuo vīta”

Dzīsme nu 2026. godā izdūtuo Sovvaļnīka albuma “Cārtumi”. Dzīsmis muzykys autors ir Ingars Gusāns, bet vuordu autors – Pīters Jurciņš.

5. Tradicionaluos muzykys grupa “Banga” – “Rudiņs īti”

Tradicionaluos muzykys grupys “Banga” īdzīduotuo latgalīšu tautysdzīsme “Rudiņs īti” nu 2023. goda golā izdūtuo tautys muzykys albuma “Devums”.

6. Bārnu kors “Zalta pūga” – “Lai jau kreit”

Muokslu izgleiteibys kompetencis centra “Latgolys Muzykys i muokslys vydsškola” bārnu kors pedagogu Andys Lipskys i Juoņa Veličko vadeibā sagatavejuši grupys “Dabasu Durovys” dzīsmi “Lai jau kreit” jaunā aranžejā. Dzīsmis “Lai jau kreit” autors ir muziks i grupys “Dabasu Durovys” liders Arņs Slobožanins, bet juos jaunuo aranžeja topuse sadarbeibā ar Ilonu Rupaini. Vaira ap dzīsmi ITE.

7. Grupa “Tautumeitas” – “Dīzgon borgais rudiņs nuoca”

Grupys “Tautumeitas” īdzīduotuo “Dīzgon borgais rudiņs nuoca” nu 2020. godā izdūtuo albuma “Dziesmas no Aulejas”.

8. Apvīneiba “MKH41” – “Malnais Rudins”

Dzīsme “Malnais Rudins” ir nu hiphopa apvīneibys “MKH41” 2022. godā izdūtuo miksteipa “Piec 20:00”. Skaņdorba bita autors ir Jezups.

9. Maris Briezkalns Quintet – “Rudiņs bolss”

Dzīsme nu 2023. godā izdūtuo i Latgolys regionam veļteituo Māra Briežkalna kvinteta albuma “Latgalian Evergreens”. Dzīsmē “Rudiņs bolss” skaņ ari etnodžeza dzīduotuojis Birutys Ūzulenis (Ozoliņas) bolss.

10. Duets “Paprika” – “Solti vieji”

Dzīsmis “Solti vieji” vuordu i muzykys autoris ir dueta dalineicys, bet dzīsmis īrokstu produciejs i dzīsmi aranžiejs muziks Arņs Slobožanins. Dzīsmis video verseja topuse rudineigajā Rēzeknē i juos apleicīnis šmukajuos vītuos – Veremu pogostā kai pi Odumovys azara, tai Taudejuoņūs. Duets nūruoda, ka koč i varātu pasaruodeit, ka dzīsme “Solti vieji” ir par rudini, vys tik tuos golvonuo dūma ir par gryuteibu i skumu puorvariešonu, nanūstuošonu i īšonu iz prīšku. Vaira ap dzīsmi ITE.

Ka portala lakuga.lv skaiteituojim padūmā ir vēļ kaidys dzīsmis, kū vajadzātu īkļaut rudiņam veļteitajā latgaliskūs dzīšmu izlasē, drūsai tū var īraksteit komentarūs.