Rokstu sagataveja: portals lakuga.lv

Duets “Paprika” pīduovoj nūsaklauseit jaunū dzīsmis “Solti vieji” i nūsavērt dzīsmis video verseju, viestej grupys publicātuo informaceja. 

Duets “Paprika” ir nu Latgolys, i tymā dorbojās divejis dzīduotuojis – Kristīne Seņkāne, kurei par sovu sātu sauc Rēzekni, i Rita Gabrusāne-Bogdanova, kuruos sāta ir Strūžānu pusē. Dzīsmis “Solti vieji” vuordu i muzykys autoris ir obejis dueta dalineicys, bet dzīsmis īrokstu produciejs i dzīsmi aranžiejs muzikis Arņs Slobožanins. Video verseju, kurei topuse rudineigajā Rēzeknē i tuos apleicīnis šmukajuos vītuos – Veremu pogostā gon pi Adamovys azara, gon Taudejuoņūs, taisejs Ēvalds Andžāns, bet dueta dalineicys klipa fiļmiešonai sapuciejuse tārpu muokslineica Velga Krukovska. Video fiļmēts ituo goda oktobra vydā i duets prīcojās, ka vēļ īspieja sagiut rudiņa lopu boguoteibu – kod video beja nūfiļmēts piec nedelis jau tūs nabeja.

Muzykalais projekts aba duets “Paprika” sovu dzimšonys dīnu svieteja 2013. goda oktobrī ar pyrmū uzastuošonu “Muzykantu saītā” Gaigalovā, koč ari sasatyka i sasadzīduoja obejis dueta dalineicys jau laiceņu pyrma. Iz kūpā dzīduošonu Kristīni jau pyrma kaidu 7-8 godu aicynuoja Rita, kod Kristīnis muzykys aktivitatis beja pamanejuse internetā – vys jau da kūpeigys dzīduošonys saguojs tikt tik piečuok. Rita sovulaik pabeiguse Juoņa Ivanova Rēzeknis muzykys vydsškolu akordeona specialitatē, nu kasdīnā struodoj par veterinaruorstu, bet Kristīne, kurei ir projektu koordinatore, muzykai pīsavārsuse pošvuiceibys ceļā. Dzīsmis komponej obejis dzīduotuojis, dueta repertuara pamatā ir dzīsmis latviski, ari latgaliski. Dzīsmis “Solti vieji” video gon ir pyrmais latgaliskuos dzīsmis video.

Par sevi “Paprika” soka tai: “Apbreinojami, kai cylvāki varbyut reizē atškireigi i leidzeigi – mes obejis vysu laiku diskutejam i streidomēs, kod runa ir par dzīšmu voi tārpu, voi kaidu izvieli. Tok tod, kod cylvākā dzeivoj muzyka, kas īt nu sirds i ir patīsa, tī namonūt kai ba saaugkūpā i aizamierst vysys seikuos sasakaseišonys. Taišni ituo īmesļa deļ myusu duetam itaids nūsaukums – papryka ir kūša i soldona, tei ir kotra sovā kruosā, bet, golvonais, dūd cytim prīcu i dvēselei ari vitaminu davu!” Obeju dueta dalineiču dažaideiba pasaruodūt ari jaunajā video – Kristīne sevi vaira sauc par piļsietneicu, Ritai tyvuoka doba. 

Koč i varātu pasaruodeit, ka dzīsme “Solti vieji” ir par rudini, vys tik tuos golvonuo dūma ir par gryuteibu i skumu puorvariešonu, naapsastuošonu i īšonu iz prīšku. Dzīsme saraksteita jau pyrma goda, bet klauseituojim pyrmū reizi atruodeita itymā rudinī, dueta pīcu godu jubileja koncertā. Duets “Paprika” rauga naapsastuot i meklej tū muzykys virzīnu, kurū tod saukt par sovu. Vaira tys niu ir šlagermuzyka, tautys muziciešona, stylu sameišona, eksperimenti. Itūgod matušys sev TV3 šova “X Faktors” izaicynuojumu, dzīduojušys koncertūs Rēzeknē, Rēzeknis nūvodā, Jiurmolā i cytur. Kristīne i Rita ir apjiemeibys pylnys turpynuot atteisteit sovu muzykys hobeju duetā “Paprika”, cerejūt, kab duetam ir sovs klauseituoju lūks, vaira dzīšmu, varbyut albums, nūsokūt: “Vīnkuorši doram tū, kas pateik!”

Roksts sagataveits ar Vaļsts regionaluos atteisteibys agenturys finansialu atbolstu nu Latvejis vaļsts budžeta leidzekļu.