Muzykalu sveicīni Latvejai pīduovoj Ludzys popgrupa “Spices”
Rokstu sagataveja: portals lakuga.lv
Latvejis dzimšonys dīnys prīkšvokorā Ludzys nūvoda Bārnu i jaunīšu centra popgrupa “Spices” sadarbeibā ar Elīnu Saukāni publiciejušys jaunu dzīsmi “Es asmu”. Vuordu autore ir Dace Tihovska, sovpus muzyku sarakstejuse Evita Podoleca (Podoļeca).
Ludzys nūvoda Bārnu i jaunīšu centra popgrupa “Spices” rodusēs nu jau tuolajā 2001. godā, grupys sastuovs ir vairuokys reizis puorsamejs, tok itūšaļt tamā muzicej pīcys jaunītis. Grupys izveiduotuoja pedagoge Evita Podoleca stuosta, ka cauri godim grupā videji vysod bejuši seši dalinīki. Evita pastreipoj, ka itei nav pyrmuo dzīsme, kurai jei ir pīrakstejuse muzyku, tok pyrmuo taišni latgalīšu volūdā. “Maņ ir daudz dzīšmu, kurys pamatā atsarūn notu būrtneicuos, tuos cīši daudz naskaņ. Itei ir plotuok izskanējuse, kam sataiseits videoklips. Pyrmuo taida plotuok izskaniejušuo dzīsme beja pyrma diveju godu, tei saucēs “Māmiņai”, ari tei dzīsme topa kūpā ar grupu “Spices”.” Kasdīnā Evita Podoleca struodoj Ludzys Muzykys pamatškolā par direktoris vītneicu i kora klasis pedagogi, kai ari ir Ludzys nūvoda Bārnu i jaunīšu centra popgrupys vadeituoja.
Dzīsmis vuordu autore Dace Tihovska stuosta, ka jau divejus godus piec kuortys pīsadola latgaliski rokstūšūs dzejnīku saceņseibā “Rogovkys dzejis voga”, kas ir īdvasmuojuse jū raksteit vēļ. “Izguoja īdvesmis laiks, i tai kai es Ludzys Muzykys pamatškolā struodoju ar bārnim, taišni gribiejuos pīraksteit nazkū bārnu auditorejai. Tai saguoja vīns dzejūleits, kurū publicēja žurnals “A12”, i muzykys školys kolege Evita pīraksteja muzyku. Dzīsmis golvonuo dūma ir, ka bārni ir kai spīgeļs, tys ir myusu atspulgs, i mums vysim kūpā juoruoda lobais pīmārs,” doluos Dace.
Dzīsmis muzykalū pavadejumu aranžēja Einārs Lipskis, vokala īrokstu i skaņu miksiešonu paveice Atis Auzāns, sovpus video fiļmēja Ivars Utināns.

Komentari