Ir nūsaslēdzs LaKuGys konkurss, kurā diveji laimeigī varieja dabuot kotrs pa div īlyugumim iz Reigys izruodi. Tod nu veiksmeiguoki nu vysim konkursa dalinīkim izaruodeja Diāna Orlovska i Raivis Logins. Paļdis vysim, kas pīsadaleja i sirsneigi sveicam uzvarātuojus. Par īlyugumu dabuošonu sasazynuosim personeigi.

Pareizuos atbiļdis iz konkursa vaicuojumim beja:

1. Kaidys gazetys svātkim sovulaik “Palādas” speciali īstudieja izruodi “Ontons i Zīmassvātki”?
B – Zīmeļlatgolys gazetys “Vaduguns”
2. Kas eistajā dzeivē piec profesejis ir Ontona i Annis tāluotuoji?
C – školuotuoji
3. Deļ kuo Baļtinovys amaterteatrim dūts nūsaukums “Palādas”?
B – mieginuojumi nūteik vālim vokorim i naktim

Taipat vysim grybātuojim atguodynojam, ka  5. janvarī 13.00 „Ontons i Anne” byus apsaverami Kekovys nūvoda Dūlis tautys nomā, bet tuos pošys dīnys 19.00 Reigā, kinuteatra „Splendid Palace” lelajā zalā. Kekovā īejis biletus iz izruodi var nūpierkt Kulturys informacejis centrā „Lība” i Dūlis tautys nomā stuņdi pyrma izruodis, moksa 2,50 Ls. Reigā biletus var nūpierkt SIA „Biļešu serviss” kasēs i škārsteiklā: http://www.bilesuserviss.lv/lat/concerts/teatris/komedija/?concert=117362, cena 3,00 – 5,00 Ls.

Kaidi ir Ontona Zīmyssvātki? Annis vadakla gryb sareikuot eistynus seņču Zīmyssvātkus, kab vysi unuki zynuotu, kai tūs pareizi svieteit. Ontons i Anne pīkreit. Pošā svātku vokorā seņču tradicejuos īsalauž ari myusdīnu realitate, nu nasaverūt iz tū – vyss beidzas labi i svātki izadūd!

Ar izruodis golvonajim varūnim daudzi jau ir īpasazynuši Latvejis Nacionaluo teatra izruodē “Latgola.lv”, kura uzvasta kai reiz pēc Baļtinovys dramatiskuo kolektiva  izruodis motivim, kas sovulaik cīši īpasatyka „Latgola.lv” režisoram Valdim Lūreņam.