„Latgales Pirts Ordenis” ir izsludynuojs konkursu “Latgales melnās pirts stāsts”, kurā aicynoj vysa goda laikā latvīšu ci latgalīšu volūdā īsyuteit stuostus par Latgolys malnajom piertim. Stuostus var syuteit iz e-postu info@lpo.lv ci draugiem.lv. Konkursa laikā paradzāts izveiduot E-gruomotu, kurā tiks apkūpuoti i publicāti vysmoz 22 stuosti – no kotra Latgolys nūvoda pa vīnam stuostam. Apkūpuotī stuosti byus pīejami „Latgales Pirts Ordeņa” sātys lopā lpo.lv, kai ari tiks veiduota Latgolys malnū piertu biļžu galereja.

Cylvāki jau godu symtim i godu tyukstūšim sovys zynuošonys, prasmis i īmanis nūdūd nu paaudzis paaudzē. Tāvi sovim dālim vuica vīnys prasmis i zynuošonys, muotis sovom meitom – cytys. Myusu piertim beja i ir sova nūzeime gon folklorā, gon mitologejā, kur īspiejams atrast myusu seņču nūdūtuos zinis i gudreibys, kurys jī ir sakruojušs montuojumā.

Latgolys pusis piertnīki 2012. goda suokumā nūdybynuoja regionalū piertnīku organizaceju – bīdreibu „Latgales Pirts Ordenis” – i kai vīnu nu darbeibys mierkim izvierzeja Latgolys malnuos pierts tradiceju saglobuošonu. Latvejā ir palics cīši moz pierteņu, kas teik kurynuotys kai senejūs laikūs. Teik dūmuots, ka malnuos pierts myužs tyvojās beigom, taču bīdreibys mierkis ir naļaut itom tradicejom pazust i nūdūt zynuošonys nuokamajom paaudzem, popularizēt seņču atstuotū montuojumu – pieršonūs malnajā piertī i godu symtūs izauklātuos pierts tradicejis.

Karteņa: LaKuGys arhivs
Ziņu sagataveja: LaKuGa