Nu 9. leidz 10. februaram Muolpilī i Siguldā nūtyka XIV Storptautiskais masku tradiceju festivals, kurā Dagdys nūvodu treispadsmitū reizi puorstuovēja folklorys kūpa „Olūteņi”.

Maskuošonuos tradiceja ir vīns nu namaterialuo kulturys montuojuma sovdabeiguokajim i interesantuokajim izpausmis veidim. Lai tū saglobuotu, popularizātu i atteisteitu myusu dīnuos, ik godu dažaiduos Latvejis vītuos teik organizāti storptautiski masku tradiceju festivali.
Kotrs masku festivals ir sovdabeigs i naatkuortuojams – ar sovu eipašū skaņu, kruosu, smaržu, izskotu i emocejom. Festivals Muolpilī i Siguldā prīcēja ar plašom i daudzveideigom masku grupu darbeibys programmom, kinu demonstriejumim, foto izstuodi, pietnīku viestejumim i komentarim, kai ari uorvalstu gostu daleibu.
Festivalā pīsadaleja ap 20 masku grupu, starp tuom beja ari dalinīki nu Leivuona i Riezeknis. Beja sastūpami čyguoni, kaitys, vastoluova i cytys masku grupys.
Dagdys folklorys kūpa „Olūteņi” nu festivala atsagrīze ar divejom uzslavom – vīna uzslava tyka sajimta par rodūšumu tradiceju uzturiešonā, ūtra tyka daškierta individualajai maskai Valna muote ar Valnu.

Vēļ tikai vīnu reizi 23. februārī 14 stuņdēs Lubuonys piļskolnā varēs satikt maskuotūs ļauds i ļautīs dažaidom izdareibom, lai ari Dagdys pusē gūdam varātu atsavadeit nu zīmys i prīceigai dūtīs pretim pavasaram, veicūt kuortejū ritualu sevis i pasauļa sakuortuošonā.

Kartena: XIV Storptautiskuo masku festivals, Dagdys nūvoda folklorys centrs
Ziņu sagataveja: LaKuGa