Ituo goda 11. februarī Viļakys nūvoda muzejam Latvejis Republikys Kulturys ministreja izsnīdze akreditacejis aplīceibu, kas nūzeimej, ka muzejs nūdrūsynoj kvalitativu, profesionalu, iz sabīdreibys interesem i vajadzeibom orientātu muzeja darbeibu.

Viļakys nūvoda muzejs atsarūn piļsātys kultūrviesturei nūzeimeigā ākā – „Gaismys zalā” –, kas byuvāta 1913. godā. Muzeja ekspozicejā atspūguļuota Viļakys piļsātys i tyvuokuos apleicīnis viesture nu 13. godu symta leidz myusu dīnom – nūzeimeiguokī nūtykumi, izcyluokuos personeibys i laikmeta līceibys; apsaverami nūvodam rakstureigī etnografiskī materiāli – dorba reiki, vītejūs pūdnīku darynuojumi, sātā austuos tekstilejis i cyti prīkšmati. Muzejā īkuortuotajā „Boltajā ustobā” var izzynuot par nūvoda kristeigūs draudžu – katuoļu, pareizticeigūs i luterāņu – viesturi. Katuoļu veiskupim Kazimiram Duļbinskim i Valerjanam Zondakam veļteitajā pīminis ustobā apsaverami goreidznīku omota pīdarumi i personeiguos lītys. Izstuožu zalā itūšaļt apsaverama muokslinīku Juoņa Laicāna i Annys Laicānis dorbu izstuode.

Muzejs atsarūn Viļakā, Bolvu īlā 13, tuo vadeituoja ir Marija Boldāne. Ar muzeju var sasazynuot pa epostu vilakasmuzejs@inbox.lv ci telefonu +371 64563302, mob. +371 25851161. Apmaklātuojim muzejs atvārts dorba dīnuos nu 9:00 leidz 16:00, ka ir interese muzeju apmeklēt uorpus dorba laika, juosasazynoj ar muzeju pa īprīkš nūruodeitajim telefona numerim.

Īskotam dažys šaļtenis nu muzeja:

Kartenis: Viļakys nūvoda muzejs
Ziņu sagataveja: LaKuGa