2013. godā paīt 90 godu nu pyrmuos latgalīšu pamatškolys atkluošonys Sibirī — Tjažynys rajona Poperečnajā. Ar laiku latgalīšu školu skaits Krīvejā izaug da 70 pamatškolu i 7 napylnūs vydsškolu (Jaunadamovā, Borokovkā, Kreslavkā, Maličevkā, Okuņovā, Timofejevkā, Akimo-Anenkā), Ačynska Pedagogiskajā tehnikumā dorbojās Latgalīšu nūdaļa (1931–1938). 20. gs. 20.–30. godi ir latgalīšu kulturys izplaukuma laiks Padūmu Krīvejā: veidojās i sakuploj latgalīšu periodika („Taisneiba“, „Ceiņas Karūgs“, „Latgalīšu kalendars“), spākā jamās jauni autori (I. Kūkojs, O. Začs, A. Mežule, A. Ladusāns, D. Logins i c.), gaismu i dzymtuos volūdys prīcu tautā dadz Latgalīšu kolhoznīku teatris. Školom teik gataveiti vuiceibu leidzekli, metodikā i didaktikā jaunus viejus īnas V. Daškeviča, gruomotys deļ dzymtuos volūdys vuiceišonuos roksta jei poša, taipat J. Silinīks, A. Eisuļs, I. Meikšāns, P. Grovers, M. Zaļāne. Itam laikam tīk veļteita 6. storptautyskuo latgalistikys konfereņce „LATGALĪŠU ŠKOLU SUOKUMAM SIBIRĪ — 90”, kas nūtiks nu 19. da 25. augustam.

Konferenci organizej Krasnojarskys nūvoda regionaluo sabīdriskuo organizaceja „Latgalīšu kulturys centrs“ (Krīveja), Latvejis Universitate (Latveja), Sanktpīterburgys Vaļsts universitate (Krīveja).

Pīsasacejumus konfereņcei (pīsasacejuma anketu i referata kūpsavylkumu da 300 vuordu) da 2013. goda 15. juņa juosyuta iz adresi latgalec@list.ru. Paziņuojums par pīsasacejuma pījimšonu voi napījimšonu tiks izsyuteits da 2013. goda 1. juļa.

Konfereņcis dorba volūdys — latgalīšu, latvīšu, krīvu, angļu. Referatim, kurī ir latgalīšu / latvīšu ci angļu volūdā, prosom sagataveit prezentaceju ci kūpsavylkumu krīvu volūdā. Konfereņcē skaiteitūs referatus varēs publicēt zynuotniskūs rokstu kruojumā. Daleibys moksys nav.

Tuoļuok vaira par konfereņci i pīteikuma anketa