Izdevnīceibys „Neputns” serejā „Mākslas pieminekļi Latvijā” iznuokuse muokslys zynuotneicys Dr.art. Rūtys Kaminskys i Anitys Bisteris gruomota „Sakrālās arhitektūras un mākslas mantojums vēsturiskajā Preiļu rajonā”.

Izdavumā apsavārti i atainuoti divdesmit ostoni dīvnomi kuodreizejā Preiļu rajonā, tūs vydā Aglyunys Vysusvātuokuos Jaunovys Marejis Debesīs uzjimšonys Rūmys katuoļu bazilika, Bieržgaļa Dīva apredzeibys Rūmys katuoļu bazneica, Eleonorvilis kapela, Kostigovys vacticeibnīku lyugšonu noms i cytys sakraluos arhitekturys celtnis i daudzveideigī sakraluos muokslys paraugi tymuos.

Kuodreizejā Preiļu rajonā, taipat kai vysā Latgolā, bejušs atrūnamys vysu tradicionalūs konfeseju – gon kristīšu (katuoļu, pareizticeigūs, luterāņu, vacticeibnīku), gon Mozus ticeigūs – svātvītys. Pošlaik par itū montuojumu var runuot vysmoz treis godsymtu garumā. Senuokuos celtnis nuok nu 18. gs. vyds, bet iz vītys topušūs muokslys dorbu datiejums pamatā aizasnīdz leidz 17./18. gs., kaut īvastuos vierteibys datejamys jau ar 15. godu symtu.

Gruomota baļsteita iz plašuokai sabīdreibai mozuok pazeistamu materialu, kas globojās Vaļsts kulturys pīminekļu aizsardzeibys inspekcejis Pīminekļu dokumentacejis centra arhivā i ītver ari pyrmskara pietnīku savuoktuo Pīminekļu valdis arhiva dokumentus. Izmontuota ari cytu dokumentu kruotuvu informaceja i Latvejis i uorvaļstu pietnīku akademiskuos publikacejis.

Ziņu sagataveja: LaKuGa