Atkluos muokslinīkam Juoņam Undam veļteitu izstuodi
Latgolys gleznuotuojs Juoņs Unda 23. junī svieteitu 85 godu jubileju. Atzeimejūt J. Undys jubileju, Rēzeknis piļsātys Centraluos bibliotekys laseitovā (Atbreivuošonys alejā 81/5, 3. stuovā) nu 16. leidz 30. juņam byus apsaverama tematiska gruomotu izstuode par muokslinīka myužā padareitū.
Juoņs Unda skaitoms par izcyluokū akvareļglaznuotuoju Latgolys nūvodā i ir vīns nu radzamuokajim klasiskuo akvareļa puorstuovim Latvejā. Latgolys doba vysa muokslinīka myuža garumā ir bejuse naizsmeļams īdvasmys olūts.
Unda skaitoms par Latgolys dobys tāla atkluojieju i izteicieju latvīšu akvareļgleznīceibā, par tū līcynoj dorbi „Latgales māls” (1964), „Rudens Latgalē” (1982), „Latgalē” (1988), „Latgales pakalnos” (1995). Muokslinīks sevi pats gon nav saucs par Latgolys gleznuotuoju – tai jū septiņdesmitūs godu vydā nūsauce muokslys kritiki.
Karteņa: J. Undys glezna „Latgalē”
Ziņu sagataveja: LaKuGa piec Rēzeknis piļsātys Centraluos bibliotekys materialim
