„Gorā” varēs nūsavērt uzvadumu „Ķēniņmeita. Latgales pasaka”
Latgolys viestnīceibā „Gors” Starptautiskuo Baltejis jiurys regiona vaļstu eiskinu festivala „Open Place” ītvorūs tiks izruodeits uzvadums „Ķēniņmeita. Latgales pasaka”.
Festivala atkluošonys koncertā 31. julī byus īspieja nūsavērt muzykalū uzvadumu „Ķēniņmeita. Latgales pasaka”, kas sovu pyrmizruodi pīdzeivuoja Latgolys viestnīceibys „Gors” atkluošonys koncertā maja beiguos. Uzvadums atkluoj Latgolys ļaužu sapynus i cereibys, atspūguļoj sovdabeigū, dažaidu naceju ītekmātū Latgolys folklorys bogoteibu, ituos pusis muziķu, doncuotuoju i spālātuoju prasmis. Uzvadumā pīsadola ap symts dorbojūšūs persony nu Latgolys. Prīkšnesuma veiduošonā īsasaistejuse ploša i daudzveideiga rodūšuo komanda: komponiste Ilona Rupaine, režisors Uģis Brikmanis, vokaluo pedagoge Anda Lipska, muzikis Einārs Lipskis, horeografi Inga i Ilmārs Dreli, literats Raibīs Suņs, scenografs Aigars Ozoliņs i tārpu muokslineica Ināra Apele.
Karteņa: Juoņs Litavnīks
Ziņu sagataveja: LaKuGa piec pasuokuma organizatoru informacejis
