30.oktobrī vīna nu Letonikys kongresa sekcejom dorbuosīs ari Rēzeknis Augstškolā. Školuotuoji, zynuotnīki i atbiļdeigūs instituceju puorstuovi sprīss par latgalīšu volūdys īspiejom školā.

3. pasauļa latgalīšu saītā tyka pījemta rezoluceja, kurys 2.2. punkts paredz, rūsynojūt školuotuoju iņteresi par latgalīšu volūdys, literaturys i viesturis vuiceišonu, IZM finaņsiejuma mierkdotaceju vierzeit atbylstūša vuiceibu prīkšmata apgivei. Puorsavērt vuiceibu saturu, vīnu stuņdi nedeļā dūdūt nūvodmuoceibai Latvejis školuos, lai styprynuotu lokaluos i nacionaluos identitatis veiduošonūs.

Pasateicūt Rēzeknis dūmis i Rēzeknis izgleiteibys puorvaļdis atbolstam, Rēzeknis školuos jau nu ituo vuiceibu goda ir prīkšmats „Nūvodmuoceiba”, kai ari 25 školuotuoju grupai ir dūta īspieja apmeklēt Tuoluokizgleiteibys kursus Rēzeknis Augstškolā. Školuotuoji na tik viņ klausuos lekcejis i pīsadola praktiskajuos nūdarbeibuos, bet veidoj ari muoceibu prīkšmata programys atbylstūšajom klasem.

Kab īsuoktais process naapsastuotu, roduos dūma Letonikys 5. kongresa vīnu nu sekcejom veļteit latgalīšu volūdus vaicuojumu apskotam, partū 30. oktobrī byus vareiba dzierdēt Juri Cibuli i Lideju Leikumu, stuostūt par jaunū latgalīšu volūdys lementari, Annu Vulāni i Veroniku Dunduri, kas atguodynuos latgalīšu volūdys standarta pamatprincipus, Latvīšu volūdys agenturis puorstuovi Daci Dalbiņu, kas taipoš kai Vispuorejuos Izgleiteibys satura centra puorstuove Aiva Neimane pauss atbiļdeigūs instituceju redzīni par latgalīšu volūdys īspiejom školā.

Byus ari inspirejūšs Annys Rancānis redzīņs par latgalīšu ideņtitati, īvadvaicuojumus latgaliskuma izpratnei pīduovuos Rēzeknis Augstškolys muoceibu spāki: Angelika Juško-Štekele, Sanita Lazdeņa, Ilga Šuplinska. Tok leluokais sasnīgums ir Rēzeknis piļsātys školuotuoju uzastuošona konfereņcē, demonstrejūt sovu pīredzi muoceibu prīkšmata „Nūvodmuoceiba” programys izstruodē. Kai programmu izstruode, tai muoceibu leidzekļu sagatavuošona ir pošā suokumā, bet aicynuoti vysi, kas ir īinteresāti latgaliskū vierteibu aktualiziešonā školys programos.

Konfereņce nūteik ar vaļsts programys „Nacionalā identitāte” i Rēzeknis Augstškolys finansiālu atbolstu. Konferencis programu verīs ite.

Ziņu sagataveja:Ilga Šuplinska,
vaļsts programys „Nacionālā identitāte”koordinatore Rēzeknis Augstškolā