5. decembrī 14.00 Kaunatys kulturys nomā byus diska „Kaunatys vītu vuordu stuosti” prezentaceja. Vysi ineteresenti aicynuoti iz kūpeigu kinys nūsavēršonu. Byus ari sarunys ar teiciejim i ekspedicejis dalinīkim pi kūpeiga peirāga.

Kinys veiduošonā puorsvorā izmontuoti 2012. goda folklorys ekspedicejis materiali, kas pamatā vuokti Kaunatys apleicīnē. Kina „Kaunatys vītu vuordu stuosti” turpynoj Rēzeknis Augstškolys izdavumu tradiceju, stuostūt par kaidu nu folklorys žanrim, kai ari raksturojūt kaidys konkretys Latglolys vītys folkloriskuos i kulturviesturiskuos tradicejis. Žanriskais īrūbežuojums beja teikys i legendys. Diskā ir raudzeits paruodeit vītejū dzeivuotuoju attīksmi pret dzymtū vītu, maklātys atbiļdis iz vītu vuordu izdūtojom meiklem, izklauseitys teikys i nūstuosti par Latgolai svareigim geografiskajim objektim – Rāznys azaru, Muokuļkolnu, Lelū Līpu kolnu, Dzierkaļu kolnu – ruodeita tūs nūzeime Latgolys kulturys telpā.

Disks „Kaunatys vītu vuordi stuosti” tiks duovynuots gon pošam pogostam, gon ari teiciejim, kas sasadorbuoja folklorys praksis laikā ar Rēzeknis Augstškolys studentim i docuotuojim. Ari Latgolys školys, bibliotekys un muzeji kinu par Kaunatu varēs izmantuot kai bilingvalu izzinis i vuiceibu materialu i paleigleidzekli Kaunatys i tuos apleicīnis vītu vuordu, nūstuostu i teiku izzynuošonai.

Kaunatīšu folklorys materiali tyks izvītuoti ari Rēzeknis Augstškolys sātys lopā folklora.ru.lv. Kūpumā savuoktys gondreiž 1500 folklorys vīneibys, tymā skaitā, nūstuosti, anekdotis, puorsokys (506), dažaidi tautys tradiceju aproksti (134), parunys, sokomī vuordi, meiklis (193), tautys magejis vāruojumi (76) i dzīšmu folklora (408). Ir svareigi naizsvīst, nasadadzynuot, naaizmierst sovys jauneibys atminis, dzeivis pīredzi, pīraksteituos kladis, ar kotru godu tū vierteiba kliust arviņ leluoka. Dzīsmis, dejis, rūtalis, receptis, teikys un nūstuosti – kotrs nu žanrim sovā veidā ļaun cylvākim īpazeit tyvuok vīnam ūtru, saglobuot kultūrviesturiskū montuojumu, bet pats svareiguokais – izdzeivuot latgaliskū dzeivis ziņu.

Viesti sagatavēja: Ausma Sprukte, Rēzeknis Augstškolys HJZF, 3. kursa filologs