Decembris i Zīmyssvātku tyvuošonuos ir eistais laiks, kab nūsavārtu Baļtinovys dramatiskuo kolektiva “Palādas” popularuos izruodis “Ontons i Anne” 6. daļu “Ontons i Zīmassvātki”, kurys autore ir Danskovīte aba Anita Ločmele.

Kaidi ir Ontona Zīmyssvātki? Annis vadakla gryb sareikuot eistynus seņču Zīmyssvātkus, kab vysi mozbārni zynuotu, kai tūs pareizi svinēt. Ontons i Anne pīkreit. Pošā svātku vokorā seņču tradicejuos īsalauž ari myusdīnu realitate, nu nasaverūt iz tū – vyss beidzas labi i svātki izadūd!

Reigys pusē izruodis varēs redzēt 21. decembrī – 12:00 Salaspils k/n “Enerģētiķis”; 16:00 i 19:00 Ulbrokys kulturys nomā.

Pyrms i piec izruodem dorbuosīs “Latgolys Studentu centra” gruomotu golds.

Ziņu sagataveja: LaKuGa
Karteņa: LaKuGa