Latgalīšu atbolsta Fanu reiss iz “Dabasu Durovu” uzastuošonu Viļņā
12. aprelī iz Viļņys koncertzalu i klubu LOFTAS dūsīs Fanu reiss nu Rēzeknis i Daugovpiļs, atbolstūt latgalīšu grupu “Dabasu Durovys”, kas Lītovā atkluos īspaideigu pop i deju muzykys nakti.
10. aprelī Tallinā, 11. aprelī Reigā i 12. aprelī Viļņā uzastuos dīdžeja Calvin Harris vokaliste, par Lelbritanejis underground muzykys veterani sauktuo Ayah Marar. Vysuos trejuos vaļstīs itūs prīšknasumus atkluos daugovpilīšu “Dabasu Durovys” koncerts, ar speciali angļu volūdā sagataveitu programu.
Itūreiz Fanu reiss īrūbežuotam skaitam cylvāku suoksīs 12. apreļa reitā Rēzeknē, lai dūtūs iz Daugovpili uzjimt puorejūs dalinīkus i pavodūņus – Daugovpiļs muziķus Eviju Smagari i Ediju Jurēvicu, lai, kūpeigi padzīžūt, pavadeitu puors stuņdis ceļā iz Viļņu.
Beleti daleibai Fanu reisā i koncerta apmekliejumam Viļņā atrūnamys sātys lopā fanureiss.lv, kurā var ari īsapazeit ar braucīņa programu. Beletu cena ir 39 EUR (27,41 Ls), naatkareigi nu tuo, voi teik braukts nu Rēzeknis voi Daugovpiļs. Vaira par koncertim Reigā, Viļņā i Tallinā var skaiteit ite.
