Trešdiņ, 30. aprelī, nu 10.30 Leivuonā nūtiks Leivuona i Ilūkstis nūvodu 13. Gruomotu svātki, kuru ītvorūs paradzāta ploša i interesanta pasuokumu programa vysaidom īdzeivuotuoju vacuma i interešu grupom. Gruomotu svātkūs īspieju īsaguoduot gruomotys pīduovuos ari Latgolys Studentu centrs.

Nu 10.30 leidz 15.00 Leivuona nūvoda Kulturys centra foajē dorbuosīs gruomotu komercizstuode – puordūšona, kur sovus skaiteituojus gaideis na tik Latgolys Studentu centrs, bet ari izdevnīceibys “Zvaigzne ABC”, “Jumava”, “Lauku Avīze”, “Nordik”, “Avots”, “Divpadsmit” i cytys.

11.00 Leivuona nūvoda Kulturys centrā nūtiks gruomotu svātku atkluošona, bet iz reizis piec tuos “Latvijas Avīzes” reikuotuo publiskuo diskuseja “Trūkst darba vai kvalifikācijas?” Pīsadaleis lobkluojeibys ministrs Uldis Augulis, EP deputate Inese Vaidere, EP deputats Krišjānis Kariņš, 11. Saeimys deputats Andris Bērziņš. I iz atkluošonu, i diskuseju aicynuoti vysi interesenti.

Nu 13.00 leidz 14.00 i lelus, i mozus Gruomotu svātku apmeklietuojus pi Leivuona 1. vydsškolys sporta zala  gaideis kūpeigys pušdinis “Zemessarga spēka putra”.

Vysaidu vacuma grupu interesentim Gruomotu svātku ītvorūs byus īspieja sasatikt ar rakstnīkim, žurnalistim i muokslinīkim, kuri atraktivā formā pastuosteis par sovu rodūšū darbeibu, gruomotu topšonu i cytom interesantom lītom.

Pīaugušajim teik pīduovuota īspieja sasatikt ar rakstnīku i ceļuotuoju Pēteri Strubergu, kai ari ar Latvejis futbola tīsnesi i sporta žurnalistu Miķeli Rubeni.

Leivuona nūvoda Centralajā bibliotekā muokslineica Melānija Vilka vadeis rodūšū nūdarbeibu bārnim “Zīmējam burtiņus un ciparus”, aizraujūšus stuostus stuosteis gruomotys “Piglas stāstiņi” autore Vita Štelmahere, kas īsarass kūpā ar sovu suni Rafi, sovukuort Leivuona 1. vydsškolys stadionā nūtiks aktivitatis, kuru laikā varēs izzynuot par rūbežsardzis dorbu i vāruot dīnasta suņu paraugdemonstriejumus.

Leivuona 1. i Leivuona 2. vydsškolā pusaudžus i jaunīšus fantazejis pasaulī aicynuos rakstneica Laura Dreiže, iz muzykalu kūpā byušonu – muzikis Andris Kivičs, iz stila školu –  vizāžiste i stiliste Ineta Lesīte, iz izzynūšu sasatikšonu “Par visu, kas tev apkārt” –“Ilustrētā junioriem” žurnala rodūšuo komanda. Sovukuort Leivuona kulturys centrā nūtiks diskuseja kūpā ar Latvejis Bārnu fonda psihologi Ilzi Zariņu “Drosme draudzēties”.

Pasuokuma noslāgumā Leivuona nūvoda Kulturys centra Lelajā zalā nūtiks jaunuokūs gruomotu izlūze “Veiksmīgais pircējs” (vysim, kas byus īsaguoduojuši gruomotys komercizstuodē), bet iz reizis piec tuos muzykala izruode “Pēc skaudra maiguma” (K.Skujenieks) – latvīšu dzeja muzykā komponista Jāņa Lūsēna, dzīduotuoja Uģa Rozes i dūmubīdru izpiļdejumā.

Pasuokuma iniciatore ir Lauku biblioteku atbolsta bīdreiba.

Vaira informacejis var atrast ite.

Ziņa sagataveita piec pasuokuma organizatoru dūtuos informacejis