“Cytaidi latviskais” 17. augustā
Dzejnīks Valentins Lukaševičs myus īpazeistynuos ar reidzineicu Daigu Lapsu. Daiga pabeidze Rēzeknis Lītiškuos muokslys vydsškolu 1986. godā i nu vuiceibu laika pa drupeitei īsakļuove Latgolys eipašajā koloritā, sasajuta tam pīdereiga i niu iz Reigu brauc tik gasteit. Jei dzeivoj Kruoslovā, gatavej gobelenus, gleznoj, struodoj ar muolu, taisa lelis i traukus, šyun, izšyun, oda i tamburej, veidoj sovu tārpu kolekceju. Sīvīte ar miļzeigom dorba spiejom, ideju puorpylna i par sovu miseju skaita muokslys dzeivis veiduošonu Latgolā, kurai poša jiutās pīdereiga.
Juos kasdīnys izpausmis radzamys i dzieržamys tik muokslys volūdā, pat godim kūpta tradiceja “raksteit’’ dīnysgruomotu- patīseibā ir miļzeigys skiču i zeimiejumu kladis, kas taidā veidā stuosta par aizvadeitū dīnu.
