4. novembrī 14.00 Latgolys Centraluos bibliotekys abonementā tiks atkluota Nadeždys Krivohižinys personalizstuode “Gleznīceiba”.

Nadežda Krivohižina ir dzymuse Daugovpilī i dabuojuse izgleiteibu Daugovpiļs Universitatē. Nu 2000. goda dorbojās kai breivmuokslineica. Gleznoj paneļgleznīceibys tehnikā realisma, ekspresionisma i abstrakcionisma žanrūs. Muokslineicys smolkuo kruosu uztvere ļaun veiksmeigai izmontuot i ellis kruosys, i akvareļus i pasteļkruosys.

Nadeždys Krivohižinys dorbi ir tematiski daudzveideigi – abstrakcejis, ainovys, portreti, klusuo doba i cyti. Tūs caurstruovoj vīgls lirisms i harmoneja. Muokslineicys gleznys teik raksturuotys kā māmys līcineicys, kas izteiksmeigai paviestej vuordūs naizsokamū. Poša muokslineica atkluoj, ka juos daiļrade ir dzili personisku puordzeivuojumu atveiduojums i mieginuojums tvert i atspīgeļuot apleicamuo pasauļa skaistumu.

Nu 2003. goda Nadežda Krivohižina ir aktiva muokslys izstuožu dalineica. Da šam ir nūtykušys treis muokslineicys personalizstuodis, tamā skaitā Daugovpiļs Nūvodpietnīceibys i muokslys muzejā i Daugovpiļs Krīvu kulturys centrā. Nadežda Krivohižina ir pīsadalejuse ari deveņuos kolektivuos izstuodēs, tamā skaitā Daugovpiļs Marka Rotko muokslys centrā (2013) i Uorzemu muokslys muzejā Reigā (2009).

Nadežda Krivohižina ir storptautiskuos muokslinīku i literatu kusteibys IMAGINE & POESIA dalineica (Turina, Italeja), kai ari storptautisku konkursu i muokslys projektu laureate. Juos dorbi globojās privatuos kolekcejuos Latvejā, Krīvejā, Zvīdrejā, Pūlejā i Lelbritanejā.

Latgolys Centralajā bibliotekā Nadeždys Krivohižinys dorbi tiks ruodeiti pyrmūreiz. Izstuode byus apsaverama leidz 1. decembram.