Suokusēs pretendentu dasaceišona Latgalīšu kulturys goda bolvai “Boņuks 2014”. 2015. goda 22. februarī bolvys padūs jau septeitū reizi. “Boņuks” ir vīneiguo bolva, kas eipaši izceļ i gūdynoj sasnāgumus latgalīšu kulturys dzeivē.

Latgalīšu kulturys goda bolvys “Boņuks” mierkis ir veicynuot latgalīšu kulturvidis saglobuošonu i atteisteibu, kai ari apkūpuot i gūdynuot spūdruokūs i nūzeimeiguokūs sasnāgumus latgalīšu kulturā pārnejuo goda grīzumā. Bolvys aizsuocieji 2008. godā ir bīdreibys “Kukuži” i “Latgolys Producentu Grupa”, nu pārn Latgalīšu kulturys goda bolvys organiziešonā īsasaisteja Latgolys viestnīceiba GORS. Ituo goda bolvai pretendentu dasacejumi teik pījimti 20 nominacejuos, kas skar sabīdryskuos aktivitatis, muzykys i literaturys sferys.

Kas gods Latgalīšu kulturys goda bolvys padūšonys ceremonejā sasateik aktivuokī ļauds, kurūs darbeibys, dzeivis aicynuojuma i nūsadorbuošonys lauks ir latgalīšu kultura ci ar tū saisteituos atzaris. Kotru godu bolvu pasūšonys ceremoneja teik padareita boguotuoka ar latgaliskim muzykalim prīšknasumim. Īprīškejā ceremonejā iz skotivis kuope gon grupys “Bez PVN” i “DabasuDurovys”, gon projekts “Kapļi” i ari muzikis Kārlis Kazāks. “Boņuks 2014” pasuocīņa pyrmajā daļā īcarāts vēļreiz paruodeit oktobrī pyrmizruodi pīdzeivuojušū izvadumu “Francis”, kas veļteits īvārojamajam vaļstsveiram Fraņčam Trasunam. Iz apbolvuošonys ceremoneju kluotīnē ir gaideits kotrs interesents.

Aizpiļdeitys dasacejuma anketys bolvai “Boņuks 2014” elektroniska dokumenta formatā ci aizpiļdeita škārsteikla dasacejuma veidā Latgolys viestnīceiba GORS gaideis da 2015. goda 15. janvara. Īsnāgtūs dasacejumus izvērtēs kompetenta žureja sovu sferu profesionaļu sastuovā.

Īprīškejā reizē bolvys par padareitū, sasnāgumim ci aktivitati latgalīšu kulturā 2013. godā sajieme Latvejis Televizejis laidīņs “Cytaidi latviskais”, Latvejis Radejis laidīņs “Kolnasāta”, fotografa Māra Maskalāna foto projekts “Nagļi. LV 4631”, Latgolys lingvoteritorialuo vuordineica,  projekts “Kapļi”,  grupys “Bez PVN”, “DabasuDurovys” i cyti, nu bolva par myuža īguļdejumu latgalīšu kulturā tyka padūta kordirigentei i muzykys pedagogei Terēzijai Brokai.

Latgalīšu kulturys goda bolvys “Boņuks 2014” nūtikšonu atbolsta Vaļsts Kulturykapitala fonds, Rēzeknis nūvoda dūme, Rēzeknis piļsātys dūme.

Škārsteiklā anketys var aizpiļdeit:  http://ej.uz/Bonuks2014

Sasazynuošonai i vaicuojumim: bonuks@rezekne.lv

Nūlykums i vaira dazynuošonai: http://latgalesgors.lv/lv/latgaliesu-kulturas-gada-balva-bonuks