Paguojuši vaira kai treis godi, nu laika kod „Latgalīšu Kulturys Gazeta” (LaKuGa) atsuokuse aktivu darbeibu, kasdīnys viestejūt par latgaliskom nūtikšonom Latgolā, Latvejā i pasaulī. Leidzšinejam portala dorbam leluokais atspaids ir bejs projektu konkursūs sajimtais finansiejums i redakcejis komandys pošaizlīdzeigais dorbs, nažālojūt ni sova laika, ni prasmu.

Latgalīšu kultura īt leidza laikam, nikas nastuov iz vītys, i tymā pošā laikā nateik aizmierstys tradicionaluos vierteibys, kas lelā mārā ir īdviesmis olūts jaunu radeišonā.

Portals lakuga.lv latgalīšu i puorejuos Latvejis īdzeivuotuoju vydā ir īmontuojs atpazeistameibu kai vītne, kurā var īpasazeit ar jaunuokū latgalīšu muzyku, literaturu i jaunumim cytuos muokslys formuos, izzynuot par aktualitatem regiona kulturys dzeivē i procesim paguotnē. Jau vairuokus godus portalam ir nūzeimeiga lūma Latgolys regiona kulturys izaugsmis veicynuošonā.

Īsuoktais dorbs nanūstuoj, i ari 2015. godā LaKuGā varēs skaiteit viests par latgaliskom nūtikšonom. Bīdreibys „Latgolys Studentu centrs” projekts „Latgaliešu kultūras ziņu portāls lakuga.lv” ir sajiems Vaļsts kulturkapitala fonda atbolstu portala darbeibys nūdrūsynuošonai da 2015. goda 30. juņa. Projekts paredz, ka eipaša viereiba tiks veļteita myusu dīnu latgalīšu literaturys i jaunradis atpazeistameibys veicynuošonai. Partū aicynojam rodūšūs latgalīšus naturēt sveci zam pyura i pasadaleit ar sovim dzejūlim, stuostim, dzīsmem i cytim gora dorbim, dūdūt sovu pīnasumu kulturys izaugsmē. Taipat ari aicynojam sevkuru izsaceit redzīni par nūtikšonom latgalīšu kulturā i pastuosteit par sovys pusis latgaliskajom nūtikšonom, rokstūt iz e-postu info@lakuga.lv.

Vineta Vilcāne
projekta „Latgaliešu kultūras ziņu portāls lakuga.lv” vadeituoja