Jaunajam goda suokūtīs, Rēzeknis nūvoda vokaluos studejis „Skonai” dzīduotuoji napagurst. Jau 8. janvarī daži nu jim gaideja daleibu Jaunū dzīduotuoju Zīmyssvātku dzīšmu konkursā, kas nūtyka Daugavpiļs muzykys vydsškolā. Konkursā kūpumā pīsadaleja 97 solisti vacumā nu 7 leidz 16 godim. Konkursantim repertuarā beja juoatskaņoj divys Zīmyssvātku dzīsmi (gon orginaluos, gon tautys dzīsmis), kai ari Zīmyssvātku laika sakrala rakstura dzīsmis. Solisti beja īsaroduši nu vysys Latvejis – Reigys, Līlvuordis, Aglyunys i cytom vītom, pat nu Leitovys. Ari Rēzeknis nūvoda vokaluos studejis „Skonai” dalinīki devēs pīskandynuot  Daugavpiļs muzykys vydsškolys koncertzalu. Dalinīkim itys beja pyrmais nūpītnais konkurss.

Piec nūgurdynūšuos dīnys Daugavpiļs Vīneibys noma koncertazlā nūtyka dalinīku apbolvuošona i koru koncerts. Golvonū bolvu – Grand Prix – sovā grupā sajēme Rēzeknis nūvoda vokaluos studejis „Skonai” jaunuokuo daleibnīce Marta Paula Sejāne (7 godi). Ari puorejī „Skonai” dalinīki uzruodeja lobus sasnāgumus – Laura Lucatnika (10 godi), Karīna Seile-Zundāne (16 godi) i Guntars Poplavskis (16 godi), kotrs sovā grupā sajēme II pakuopis diplomus. „Skonai” vokaluo pedagoge i muokslinīciskuo vadeituoja Guntra Kuzmina atzeist, ka itys konkurss bejs eists izaicynuojums, jo solo dzīduojums cīši atsašķir nu īrostuos ansambļa dzīduošonys. Dzīdūt ansamblī, vīnmār kaids stuov blokus, sovukuort konkursā kotram beja juodzīd ar sovu individualū speiteibu i puorlīceibu.

Rezeknis nūvoda vokaluo studeja „Skonai” gaida jaunus dalinīkus vacumā nu 10 leidz 13 godim. Nūsaklauseišona nūtiks 26. janvarī 16 stuņdēs Rēzeknis nūvoda pošvaļdeibys lelajā zalā (Atbreivuošonys alejā 95).

Karteņa: „Skonai” arhivs
Viesti sagavaeja: LaKuGa piec „Skonai” snīgtuos informacejis