Pīktdiņ, 13. februarī, Reigā, klubā “Melnā piektdiena” (Breiveibys īla 193c) nūtiks metalistu saīts “Melnā piektdiena, 13”, kurymā uzastuos vairuoki muziki, tymā skaitā ari Sovvaļnīks.

Pasuokumā spielēs taidi vītejī muziki kai “Diseim”, “Sovvaļnīks”, “Urskumug”, “Mayla” i “Zieminieki”, kai ari igauņu grupa “Aghor”.

Grupa “Diseim” ir vītejuo vacuos školys “death metal” izpiļdeituoji. Jūs debejis albums “Holy Wrath” izdūts ASV. Dreizumā grupai gaidoms jauns materials. Sovvaļnīks ir Latgolys vuorda nesiejs pasaulī, kas sovā muzykā apvīnoj latgalīšu volūdu i dzeju, īvynūt tū melanholiska folkroka i metalmuzykys apdarē. Aktivā apritē pamozom atsagrīž grupa “Urskumug”, kas nazkod spēlēja šamanisku “tribal black metal”, nu itūšaļt ar maineitu sastuovu grupys skaniejums pīleidzynojams “black” i “death” metalam.

Grupa “Mayla” izveiduota 2013. goda martā. Tuos dalinīki īprīkš givuši pīredzi taiduos grupuos kai “Asthma”, “Sacramental” , “Begotten” i cytuos. Grupys skaniejumu vyslobuok raksturuos vuordu salykums “death metal”/ “deathcore”. “Mayla” itūšaļt struodoj pi debejis albuma.

“Zieminieki” ir jaunys vāsmis vītejā pagreidis “black metal” skotuvē, nu “Aghor” ir igauņu “death metal” grupa, kas īsaspaiduojuse nu 90. godu “death metal” i vacuos školys pankroka. Grupa radeita 2013. godā. Grupys sastuovā ir muziki nu taidu igauņu grupu kai “Loits”, “Pohjast” i “Bestia”.

Pasuokuma suokums 20.00. Īīšonys moksa: 5 eiro.