Alternativuos muzykys apvīneiba “Projekts Kapļi” pīduovoj nūsaklauseit dzīsmi “Emigranta Polka” nu pavasara beiguos gaidamuo debeja albuma “Ašņa Dasys”.

Laikā, kod vysa politikys elite runoj par “Reemigracejis planu”, Kapļi ari īt tolkā ar sovu viestejumu i redziejumu par tik aktualū tematu.

Dzīsme aktualizej na suopi par tautīšu aizbraukšonu, nu ilustrej latvīša ekonomiskūs i socialūs aizbraukšonys motivus, ītierpūt viestejumu latvīšim tik rakstureigajā poļkys apdarē. Kab akcentātu tautiskū nūskaņu, īrokstā daaicynuota postfolka grupys “Rikši” vejūļneica Madara Broliša. Dzīsmis demo verseja pyrmūreiz publicāta 2013. godā Demo EP aba minialbumā “Prauda par Madali”, nu niu dzīsme tykuse pi nūbrīdušuoka skaniejuma i ir gotova sauktīs par singlu. “Kapļus” varēs dzierdēt 30. majā Rēzeknē festivalā “Seven Hills”.

Īroksts veikts “Kapļu Studejā” Buozovys cīmā. Miksēja Armands Treilihs.

Īrokstā pīsadaleja: Oskars Orlovs (bolss), Madara Broliša (vejūle), Arņs Slobožanins (gitara), Jurs Lynužs (bass), Andris Jurāns (bungys), Rasma Kulamova (tausteni), Juoņs Noviks (saksofons), Aija Čoiča (saksofons).