27. martā sova Vyslatvejis koncerttura “Mana pilsēta” ītvorūs grupa “Otra puse” uzastuos Latgolys viestnīceibā GORS. Kūpā ar jim iz skotuvis kuops ari Latgolys muziki Guntra i Sovvaļnīks.

Koncertā varēs dzierdēt i leluokūs grupys “Otra puse” hitus “Vēstules”, “Ieskaties”, “Nakts vai Rīts”, “Dievs dod”, “Pēc lietus”, i albumā “Uzzīmē mani” īkļautuos dzīsmis, i plošai publikai da šam mozuok spielātus skaņdorbus. Itūgod asūt ryupeigi struoduots ari pi jaunu aranžiejumu, pīškirūt zynomajom dzīsmem myusdīneiguoku skaniejumu.

Grupys solists Normunds Pauneņš soka, ka kotrs koncerts Latgolā jam ir lela prīca i atbiļdeiba, partū ka jis pats ir nu Varakļuonu. Jis ir ari lapnys, ka vīns nu ratūs jaunūs koncertzalu atsarūn taišni Rēzeknē, kur Pauneņam asūt ari gūds spielēt.

Rēzeknis koncertā klauseituojim sagaidoms ari pateikams puorsteigums – eipaši gosti – muziki Guntra Kuzmina i Sovvaļnīks. Popularuos “Otras puses” dzīsmis “Uzzīmē mani” i “Ave Pali” tiks pi da šam nadzierdāta skaniejuma, partū ka Normundam dzīsmēs pīsavīnuos Guntra. Taipat “Otras puses”, Guntrys i Sovvaļnīka kūpeigā izpiļdejumā varēs dzierdēt dzīsmi “Muna sirds”.

Guntra Kuzmina “Otru pusi” nūsaukuse par Latvejis romantiskuokū grupu i apsūla dzīsmēs, kuruos jei pīsadaleis, izbūrt latgaliskū gaisūtni, nu Sovvaļnīks soka, ka “Otra puse” vysod ir bejuse vīns nu juo favoritu latvīšu popmuzyka, partū jis ir pagūdynuots pīsdaleit jūs koncertā.

Grupu “Otra Puse” 1992. godā dybynuojuši Aigars Grāvers i Aigars Krēsla. Itūšaļt grupys sastuovā spielej Normunds Pauneņš (vokals, akustiskuo gitara), Ivars Makstnīks (sintezators, klavīris), Juoņs Čubars (gitarys) i Mārteņš Linde (bungys, perkusejis). 2014. godā grupa sajēme Muzykys īrokstu goda bolvu par albumu “Uzzīmē mani”.