Atzeimojūt Latvejis Republikys Naatkareibys deklaracejis 25. godadīnu, Latvejis Radeja ar eipašim svātku pasuokumim dūsīs pi klauseituoju Latgolā. Diveju dīnu garumā nu Rēzeknis Festivala parka riezeknīšim, piļsātys gostim i klauseituojim vysā Latvejā tiks pīduovuoti raidejumi i intervejis ar zynomom personeibom, vareiba izasaceit breivajā mikrofonā, kai ari koncerti, kur pīsadaleis ari Latgolys muziki.

Svātku programu 3. majā 15.05 atkluos Latvejis Radejis 1 (LR1) informativi analitiskuo programa “Pēcpusdiena” ar jaunīšu veiduotū Latvejis Radejis 5 – Pieci.lv (Pieci.lv) raidejumu “Domnīca”. Stuņdis garumā byus sasatikšona ar latgalīšim, kas beja Augstuokajā Padūmē tod, kod paraksteja Latvejis Naatkareibys deklaraceju, taipat tiks satykta popularuo Latgolys grupa “Galaktika”. Raidejumu vadeis Tāļs Eipurs, Arta Skuja i Daira Kokoreviča.

Piec ziņu 16.00 dorbu suoks Aņss Bogustovs ar raidejumu “21.gadsimta latvietis”, kurā runuos par Latgolys karūgu, Latgolys identitati i sasazynuos ar uorzemēs dzeivojūšajim latgalīšim. Sovukuort 17.05 “Ģimenes studijā” kūpā ar Agnesi Linku i Mairitu Znūteņu varēs īpazeit tradicionalūs Latgolys iedīņus.

18.15 raidejumā “Kolnasāta” ar Aigaru Runči i Justīni Savitsku tiks diskutāts, kas ir lobs latgalīts, i byus vareiba īsaklauseit grupā “Kapļi”. Par lobuokū Latgolys alternativuos muzykys grupu 2013. godā atzeitais muzykys projekts koncertēs Rēzeknis Festivala parkā iz itam mierkam izcaltuos Latvejis Radejis leluos skotuvis.

Svātdīnis vokora izskaņā Festivala parka apmaklātuojus i klauseituojus Pieci.lv tīšraidē nu 20.00 ar muzykalu balleiti izklaidēs Pieci.lv dīdžeji DJ Rudd, DJ Magnuss Eriņš i grupa “Bermudu Divstūris”.

Vaļsts svātkūs pyrmūdiņ, 4. majā, 10.05 svātku programu nu Rēzeknis aizsuoks LR1 raidejuma “Kā labāk dzīvot” komanda. Raidejuma vadeituoji Daina Jāņkalne i Elvis Jansons sasatiks ar Latgolys uzjiemiejim, kab runuotu par inovacejom i turismu Zylūs azaru zemē.

11.05 dorbu turpynuos “Kultūras Rondo” Ingvildys Strautmanis i Ingus Ulmaņa vadeibā. Tiks runuots i par Latgolys viestnīceibys GORS darbeibu, i Latgolys Kulturviesturis muzeja aktivitatem, kai ari sasatykts ar spylgtom Latgolys kulturys personeibom: “Boņuks 2014” titula “Goda cylvāks latgalīšu kulturā” sajiemieju Aleksandru Lubānu i Latgaļu Rakstnīceibys muzeja vadeituoju Pīteri Luoci. Programu muzykali papyldynuos folklorys kūpys “Bolta vīšņa” i Latgolys barda Vincenta Kūkuoja dzīduojums.

12.35 iz skotuvis kuops latvyskuos dzeiviszinis puorzynuotuoji Iveta i Vidvuds Medeni, kuri sasadzīduos ar vītejom Latgolys folklorys kūpām. Piec ziņu 13.05 vysi aicynuoti iz “Krustpunktā” breivū mikrofonu, kū vadeis žurnalisti Aidis Tomsons, Eduards Lineņš i Anna Platpīre.

Latvejis Radejis tīšraižu izskaņā nu Rēzeknis Festivala parka 14.05 akustiskū koncertu iz leluos skotuvis snēgs ituo gods Latvejis puorstuove Eirovizejā Aminata i muziks Kristaps Rasims nu grupys “Bez PVN”.

Vysi tī, kas navarēs pīsadaleit pasuokumūs kluotīnē, video tīšraidi varēs vērtīs sabīdryskūs medeju ziņu portalā Lsm.lv, nu programu klauseitīs Latvejis Radejis 1 i Pieci.lv tīšraidē.