Nu 7. marta leidz 7. apreļam Latgolys Kulturviesturis muzejā (Atbreivuošonys alejā 102, Rēzeknē) Jevgenijs Bondarenko nu Rēzeknis aicynoj iz gleznu izstuodis „Maiguma bezpruots” (Maiguma ārprāts). Izstuodē apsaveramys figuralys kompozicejis, kuruos sasavej sīvītis i veirīša maigums, atkluojūt vysu dažaiduokuos sajiutys i puordzeivojumus. Akts kai attīceibu atkluošonys, atkluoteibys i nūslāpuma stuosts.

Izstuode tiks atdareita 7. martā 15:00.

Muokslinīks par sovu izstuodi soka eisi, nu koloriti – atsasaucūt iz Zalamana Augstū Dzīsmi i aicynoj ļautīs mīlesteibys breineibai: „Bezpruoteigs maigums vard vulkana sirdī, sajaucūt manī mīlesteibu, karsmi i truokuo liduojuma sajiusmu… Cik reibynojūšs maigums! Cik reibeigs, aptuomiņs, kas puorvierš realitati sapynā. Nazynu, kas byus iz prīšku… napīmiņu, kas beja, ir viņ itys pasauļš maņ itūšaļt.”

Jevgenijs Bondarenko dzims 1973. goda 31.majā. Vuicejīs Rēzeknis 4. vydsškolā i Rēzeknis Bārnu muokslys školā, 2011. godā īgivs bakalaura gradu gleznīceibys nūdaļā Latvejis Muokslys Akademejis Latgolys filialē.

Izstuodēs pīsadola nu 2009. goda – pīsadalejs Latgolys muokslinīku dorbu izstuodē „Rudens” Rēzeknē (2009, 2010, 2011), Baltejis vaļstu izstuodē Vitebskā Boltkrīvejā (2009, 2010), grupys „Alianse” izstuodē Ludzā (2009) i Rēzeknē (2010), Rudiņs plenera dorbu izstuodē „Krāsu poēzija” Rēzeknē (2010), Rēzeknis nūvoda Audreņu KN izstuodē „Braucot garām” (2011), izstuodē „Rudens 2010” Ludzā.

Sareikuojs vairuokys personalizstuodis Rēzeknē – RMDV (2011), Teatra studejā „Joriks” (2011, 2012), Rēzeknis nūvoda Audreņu KN (2011) i Kuorsovys nūvoda Mežvydūs (2010).

Izstuode atvārta leidz 7. apreļam:
Ūtrdiņ, trešdiņ, catūrtdiņ, pīktdiņ – 10:00-17:00
Sastdiņ – 10:00-16:00
Svātdiņ, pyrmudiņ – slāgta

Īejis moksa: školānim i studentim Ls 0,20; pīaugušajim Ls 0,40; pyrma školys vacuma bārnim – breiva.

Karteņā: Jevgeneja Bondarenko „Mīlestības deja”, 2011, audaklys, olejs, 85 x 75 cm

Informaceju sagatavieja Latgolys Kulturviesturis muzejs, Maija Upeniece