Rēzekne itūgod svietej 730 godu jubileju, partū nu 31. juļa da 2. augusta vysi teik aicynuoti apmeklēt Rēzeknis piļsātys svātku nūtikšonys.

Pīktdiņ, 31. julī 19.00 Rēzekne īniers vydslaiku atmosferā, varūneigu bruninīku i daiļūs damu laikmatā. Aizraujūšys etniskuos dejis, muzyka, omotnīku meistardarbneicys i vydslaiku tierdzeņš gaideis Rēzeknis piļskolnā, nu 22.00 tradicionali vysi aicynuoti iz svātku koncertu.

Sastdiņ, 1. augustā 12.00 suoksīs pasuokumi vysai saimei – spākaveiru šovs, rodūšuos darbneicys, svātku tierdzeņš i daudz kas cyts. Vokorā – svātku guojīņs, kur pīsadaleis Rēzeknis uzjiemieji, organizacejis i pošvaļdeibys īstuodis. Paraleli tam Latgolys viestnīceibā GORS lobys muzykys cīneituoji varēs baudeit Liverpulis grupys “The Cavern Beatles” koncertu.

Vokora programys ītvorūs Festivala parkā skanēs svātku koncerts i byus guojīņa dalinīku sveikšona, kai ari 22.30 nūtiks multimedials koncertizvadums par muzyku i mīlesteibu “Satikšanās Rēzeknē” ar unikalu muzykalūs stryuklaku šovu. Dīnys nūslāgumā vysus prīcynuos svātku saluts.

Svātdīne, 2. augusts, īsasuoks ar teatralizātu guojīni “Ģimeņu parāde”. Sovukuort 12.00 Festivala parkā nūtiks dzīšmu i eksperimentu šovs “Ķertais profesors”, kurymā pīsadola Valters Frīdenbergs, studejis “Zvaigžņu sala” jaunī dzīduotuoji, LU Kīmejis fakultatis trokūs eksperimentu meistari muzykali izgleitojūšā programā bārnim i jaunīšim.