Nu 1. augusta da 1. septembra Daugovpiļs Marka Rotko muokslys centrā varēs apsavērt Daugovpiļs muokslineicys Ilonys Šaušys keramikys izstuodi “UN TAD”.

Izstuode “UN TAD” atspīgeļoj autoris pasauļa uztveri i filozofeju. Tamā ir īkļauta vērtine jaunradeitūs Ilonys Šaušys dorbu, kai ari daži pādejuos desmitgadis dorbi, kas radeiti dažaidūs vizualuos muokslys medejūs.

Izstuodis nūsaukumā izmontuotais saiklis i partikula ir leidzeklis, kab veiduotu saikni, puoreju storp cylvāka radeitū kulturu i dobu, civilizacejis viesturis laika pūsmim, nūjaucūt rūbežus storp laiku, atseviškom vaļstim, kontinentim i mitim, sajaucūt realitati ar izdūmuojumim. Izstuode ir kai ceļu teikls, kurā kotram skateituojam ļauts vaicuot i atrast sovu taku, rysynojūt sovu narativa pavedīni.

Nu 2007. goda Ilona Šauša naatlaideigi struodoj pi rudzu īraugā ryudeituos keramikys izzynuošonys, atjaunuošonys i regiona zeimūla “Baltic raku” veiduošonys, partū nūzeimeiga izstuodis sastuovdaļa ir rudzu īraugā ryudeitī dorbi, kas skateituoju īpazeistynuos ar 600 godus seneju Baļtejā pīlītuotu pūdnīceibys tehniku, kurys atjaunuošona ir vīns nu autoris viersaizdavumu.

Izstuode ir ari autoris veļtejums sovim kolegim. Izstuodē byus apsaverami Daugovpiļs muokslinīku skulpturali portreti, kurūs attāluotajim personažim pīškiertys vydslaiku, jūgendstila, mongoļu vai myusu dīnu kulturys varūņu īzeimis, izceļūt tū eipašū tālu i personeibys vierteibu, kura dīvamžāļ kasdīnys dzeivē reši teik īvāruota.

Vysi interesenti teik aicynuoti apmeklēt ari Ilonys Šaušys izstuodis atkluošonu sastdiņ, 1. augustā 16.00, Marka Rotko muokslys centrā (Mihaila īla 3, Daugovpiļs).