Latgolys kai Latvejis katuolicisma centra, vīns nu simbolim ir daudzī i dažaidī katuoļu dīvnomi. Voi esi ivāruojs, ka jī ir dažaidi na tikai piec sova uorejuo i īškejuo izskota, bet arī piec plānuojuma?

Kristīšu dīvnomu celtnīceibā pamatā izšķir četrus plānuojuma veidus – krysta, četrstyura, apļa i zvaigznis. Kotrai nu formom ir dzili simboliska nūzeime, kurys skaidruojums meklējams kristeigajā vuiceibā i Bībelē. Vysizplateituokuos formys kristeigajā pasaulī dīvnomu celtnīceibā ir krysts i taisnstyurs, Latgolā tys ir taiši taipat. Turpynuojumā nalels īskots par kotru nu plānuojuma veidim.

 

Krysta forma 

Krysta forma simbolizej Jezys Krystus nastū upuri, kura deļ jis tyka sists pi krysta. Taidā veidā itei bazneicys forma ticeigajim atguodynoj par tom cīšonom, kurys Jezus pidzeivuoja laikā, kod tyka systs pi krysta.

Attālā: Stiglovys Rūmys katuoļu bazneica

 

Četrstyura forma 

Bazneicys plānuojums parosti ir taisnsyurveida i teik saisteits ar kuģa formu i simbolizej Noasa šķierstu. Leidzeigi, kai Noass iz sova kuģa deve patvārumu kotrys sugys dzeivnīkim i taidā veidā izgluobe jūs nu grāku plyudim, tai arī ticeigī vysod Bazneicā varēs atrast patvārumu i jei jūs pasorguos vysuos dzeivis vātruos.

Attālā: Vydsmuižys Rūmys katuoļu bazneica

 

Apļa forma 

Aplis simbolizej myužeibu i piļneibu. Roksta autorei itaidys formys bazneica nav zinoma Latgolā, bet kai pimāru var minēt Reigā Kotlakona Ev. luteraņu bazneicu.

Attālā: Kotlakolna Ev. luteraņu bazneica

 

Zvaigznis forma 

Itei forma simbolizej, ka Bazneica taipat kai ceļazvaigzne, apgaismoj ticeigūs itymā pasaulī i paruoda pareizū ceļu dzeivē.

Attālā: Pušys kapela

 

Rokstu sagatavieja Vineta Vilcāne

 

Roksta sagatavuošunā izmontuotī olūti:

Pirmie soļi baznīcā. Rīga: Latvijas Pareizticīgās Baznīcas sinodes izdevniecības nodaļa, 2007. 71 lpp.

Krūmiņš, A. Latgales koka baznīcas. Rīga: Jumava, 2003. 191 lpp.

http://lv.wikipedia.org/wiki/Att%C4%93ls:Katlakalna_bazn%C4%ABca_pie_R%C4%ABgas_2000-03-05.jpg

http://www.katlakalns.lv/?ct=katlakalnabaznica

http://www.tripmondo.com/latvia/aglonas-novads/ubagava/picture-gallery-of-ubagava/

http://lv.wikipedia.org/wiki/Att%C4%93ls:Vidsmui%C5%BEas_kato%C4%BCu_bazn%C4%ABca.jpg

http://lv.wikipedia.org/wiki/Att%C4%93ls:Stiglovas_Romas_kato%C4%BCu_bazn%C4%ABca.jpg