13. oktobrī 14.00 Viesturis šaļteņu pīturā Latgolys Kulturviesturis muzejā (Atbreivuošonys alejā 102, Rēzeknē) runuos par drukys aizlīguma laiku Latgolā, tuo cālūnim i gruomotu puorraksteituojim, informej Latgolys Kulturviesturis muzeja kulturviesturis specialiste Linda Suhanova.

Apsaverūt Latgolys paguotni, radzams, ka tuos viesturē ir četrdesmit godu ilgs laika pūsms, kod beja svareigai saglobuot latgaliskū identitati. Tys ir 1865. gods, kod Latgolā suocēs drukys aizlīgums, kas ilga da 1904. goda, tys beja latīņu drukys aizlīgums.

Tys ir laiks, kod dorbuojuos Latgolys dyžgori – P. Miglinīks i A. Jūrdžs, gruomotu puorraksteituoji kotrā pogostā, partū ka latgaliski raksteituos gruomotys beja palykušys nalegalys. Suokys aizlīgumam beja 1863. godā nūtykušuo sasaceļšona, piec kurys Krīvejis Imperejis Zīmeļrītumu apgobolā suoce dūmuot, kai mozynuot pūļu muižnīku ītekmi.

Īīšonys moksa: pīaugušajim 1,50 EUR, školānim 0,80 EUR.

Skaiteit vaira par drukys aizlīgumu.

Karteņā: Latgolys Kulturviesturis muzeja kruojuma materiali – fragments nu katuoļu lyugšonu gruomotys, kas puorraksteita ar rūku (19. gs. beigys – 20. gs. suokys).