Adventa laikā Latgolys skaistuokajūs dīvnomūs i muižuos nūtiks vairuoki lobdareibys koncerti ar mierki atbaļsteit moznūdrūšynuotys saimis. Tymūs uzastuos  J. Ivanova Rēzeknis muzykys vydsškolu absolviejuši jaunīši, kurī jau pīcus godus Zīmyssvātkūs saīt kūpā i roda nalelu breinumu – aizkustynūšu koncertprogramu. Jūs sirdslīta – muzyka – padora gaišuoku apleicamūs cylvāku dzeivi.

Kai informej poši muziki, koč i itūšaļt jaunīši – Iluta i Juoņs Igauni, Laura Reksne, Jana Kuzmenkova, Agnese Urka i Ilze Grēvele – jau studej Jezupa Vītuola Latvejis Muzykys akademejā, tyvojūtīs goda gaišuokajim svātkim, jī rodūši dorbojās zem nūsaukuma “Ziemassvētku Muzikālā Apvienība” (ZMA). Tys ir projekts, kas nu jau pīktū godu Zīmyssvātku laikā reikoj lobdareibys koncertus, paleidzūt bārnim i jaunīšim, kurīm ir nūpītnys veseleibys problemys i vajadzeigs finansialais atbolsts.

Jī stuosta: “Pa itim godim asam davuši paleidzeigu rūku bārnim i jaunīšim i Rēzeknē, i Daugovpilī i cytur. Koč i nav vīglai izaraut nu kasdīnys steigas, itys ir projekts, kuram laiku atvielejam ar prīcu. Mums ir svareigi, ka varam atsagrīzt sātā – Latgalē – i sovuos dzymtajuos piļsātuos i cīmatūs īnest svineigys nūskanis. Ir pateikamai, ka, dorūt tū, kas mums vysim pasadūd vyslobuok, varam paleidzēt kaidam, kam tys vajadzeigs. ”

“Itūgod asam izlāmuši īprīcynuot bārnus nu moznūdrūšynuotajom saimem, kab ari jūs kasdīnā nastu gaismys spaiteņu. Itymūs koncertūs natiks vuokti finansiali zīduojumi, nu koncerti tiks dūti kai skaista svātku duovona. Mums paleidzēs organizaceja ADRA – Adventistu atteisteibys i paleidzeibys agentura. Tei ir kristeiga storptautyskuo paleidzeibys organizaceja, kas itim bārnim nūdrūšynuos “duovonu pakys”. Tūs saturs byus i drēbis, i školys lītys, i kaids soldonums. Tok iz koncertim teik aicynuots sevkurs! I kotrys var atnest nalelu duovoneņu, kas svātku laikā aizceļuos da bārnu i juos vacuoku, kurīm kasdīnā datryukst naudys rūtaļlītom, gruomotom i cytom vajadzeigom lītom,” atkluoj muziki.

Tai kai ZMA ar koncertim svieteis sovu pīcgadi, repertuars sastuovēs nu īprīškejūs godu dzīšmu lobuokuos izlasis. Kai jau zynoms, leluokuo daļa dzīšmu ir komponātys speciali itai apvīneibai. Tuos radejuši muziku draugi, nazkodejī školysbīdri, jaunī komponisti – puorsvorā latgalīšu komponisti i komponisti nu Latgolys. Atškireibā nu cytu godu, koncerti nūtiks na tik dīvnomūs, nu ari Lūznovys muižā, Ludzys kinoteatrī i cytur Latgolā.

Kartenis: nu ZMA arhiva i momenti.lv (Anita Austvika)