Izdūta Ontona Kūkuoja latgaliskuos dzejis izlase “Dūd pīci”

Izdūta Ontona Kūkuoja latgaliskuos dzejis izlase “Dūd pīci”

J. Soikana Ludzys muokslys škola nu 2015. goda 15. maja suoce eistynuot Vaļsts Kulturkapitala fonda mierkprogramys “Latvejis vaļsts mežu atbaļsteituos Latgolys kulturys programys” projektu “Dūd pīci voi veļtiejums ailinīkam Ontonam Kūkuojam” juo 75. dzimšonys dīnā. Drupeit nūvālojūt gūda veira dzimšonys dīnys datumu saulis atliekšonys dīnā, projekta rezultatā 2016. goda 15. janvarī dīnys gaismu īraudzeja dzejis izlase latgaliski “Dūd pīci”, informej J. Soikana Ludzys muokslys školys direktore Sandra Vuorkale.

Ar sovu redzīni par izlasi doluos dzejneica Anna Rancāne: “Ontona Kūkuoja latgaliskuos dzejis izlase “Dūd pīci” kai pa seiku stidzeni cauri rudzzuolem izvad laseituoju car vysim četrim godalaikim – nu ceiruļa prīcys pavasarī da rudeneigi suotnom i styprom pamatlītom – zemei, saulei, olūtiudisneņam. Kai vyss trokoj, kai vyss zīd itamā dzejā – bet Ontons cauri vysom godsdīnom palīk kai pylnbrīds, vysod ar sauli augši augši kai capuri līpā īsvīds. Jis ir pylnbrīda latgalīts sovā dzejā, kas nasagruoboj pa augstim plauktim, bet pazeist i zyna pastuosteit vīnkuoršuos patīseibys – apar zemi, apsiej ar rudzim – seits! Tikai pylnbrīda cylvāks spiej car zīmys soltumu i caurvieju puortā atsagrīzt da pīktuo i myužeiguo goda laika – Mīlesteibys. Ontona Kūkoja dzeja itamā izlasē ir kai juo poša pīmynātūs Līpukolna bišu sanastuos gaismys saneišona – dzeiva i sylta atsagrīšonuos pi dzymtuo puorta i dzymtuos volūdys boguoteibys.”

Gruomotys redaktore –  Katrīna Kūkuoja. Literarais i volūdys konsultants, vuordineicys sastateituojs i piecvuorda raksteituojs –  literaturzynuotnīks Valentins Lukaševičs.

Projekta eistynuotuoji lelu paļdis soka Ludzys i Rēzeknis nūvoda pošvaļdeibom i SIA Verams par atbolstu papyldus fonda daškiertajim leidzeklim, kab nūdrūsynuotu gruomotys 500 eksemplaru izdūšonu.

Izlasis 192 puslopuos skaitami 125 Ontona Kūkuoja dzejūli nu nazkod publicātajim kruojumim “Sovā saimī” (1990), “Mīlesteiba, Lelais Līpu kolns” (1995), “Oka” (1997), “Sāta” (2002), kas sakuortuoti piec dvēselis godalaiku pryncypa pīcuos daļuos: pavasars, vosora, rudiņs, zīma i otkon pavasars – mīlesteiba. Gruomotu papyldynoj S. Vuorkalis, K. Kūkuojis, A. Tomašūna fotografejis i kartenis nu dzejnīka saimis albumu. Kotrs skaiteituojs varēs sasavasaluot ar Ontonu Kūkuoju, dūmūt jam sovu rūku i dvēselis atvierteibu – dūd pīci! Gruomotys dizainu i datorsalykumu veiduoja Ludzys muokslys škola. Īspīsšonys dorbus veice SIA Jelgovys tipografeja, kas zynoma ar sovu izcylū kvalitati i gūdolgom konkursā “Zelta ābele”.

Ontona Kūkuoja dzejis izlasis “Dūd pīci” attaiseišonys i duovynuošonys gūds teik planavuots ap muokslys školys 25. dzimšonys dīnu 18. aprelī, kas ir ari Ontona Kūkuoja nuovis dīna.

vaks2

Print Friendly, PDF & Email

Kalenders

Apr
27
Sai
all-day “Satiec savu meistaru!” @ Latgola
“Satiec savu meistaru!” @ Latgola
Apr 27 – Apr 28 all-day
Tradicionalais pasuokums “Satiec savu meistaru!” itūgod byus vysa apreļa garumā i kotru nedeļgolu aicynuos interesentus iz kaidu nu latvīšu viesturiskajom zemem i Reigu izzynuot myusu namaterialū kulturys montuojumu meistarklasēs, praktiskuos nūdarbeibuos i lekcejuos, informej Latvejis[...]
10:00 “Vuolyudzāni” i latgalīšu rokstu... @ Rēzeknis Vaļsts gimnazeja
“Vuolyudzāni” i latgalīšu rokstu... @ Rēzeknis Vaļsts gimnazeja
Apr 27 @ 10:00 – 14:00
27. aprelī, Latgolys kongresa dīnā, Rēzeknis Vaļsts 1. gimnazejā (Dziernovu īlā 3a) nūtiks 24. skotuvis runys konkurss “Vuolyudzāni” i 23. atkluotuo latgalīšu rokstu volūdys i kulturviesturis olimpiade, informej Latgalīšu volūdys, literaturys i kulturviesturis školuotuoju asociacejis vadeituoja[...]
14:00 Dirigentis Andys Lipskys jubilej... @ Latgolys viestnīceiba "Gors"
Dirigentis Andys Lipskys jubilej... @ Latgolys viestnīceiba "Gors"
Apr 27 @ 14:00 – 15:15
Jau gondreiž 40 godu kordirigente Anda Lipska struodoj sovā profesejā. Dzīd. I īdrūsynoj dzīduot cytim. Ka kaids īrūsynoj, aizsuoc i mes dzīdim leidza, saīt dzīduošona voi varbyut dzīdynuošona? Nu rauduošonys aicynuojuma saīt raudynuošona, nu doncuošonys[...]