Kuorsovys nūvodam konflikts ar Vaļsts Volūdys centru (VVC). Projektā “saREDZI latgalīšu volūdu” pošvaļdeibā pastateitys īlu nūruodis, kurymuos nūsaukumi raksteiti i latgalīšu, i latvīšu volūdā. Dreiži tiks pastateitys vēļ 195 īlu nūruodis. Nu dzeivuotuoju i cytu latgalīšu sajimta atzineiba par ideju, taipat ari Latgalīšu kulturys goda bolva “Boņuks” par latgalīšu volūdys populariziešonu. Tok 2015. goda rudinī sajimts VVC aicynuojums ituos īlu nūruodis nūjimt. Īmeslis – nūsaukumam latgalīšu volūdā ir leluoks burtu izmārs nakai nūsaukumam latviski. Īlu nūruodis ir tīpat, kur tuos pastateitys, ari jaunūs zeimu dizains ir taids pats.

Raidejumā teik skaidruots, kaids ir VVC lyuguma pamatuojums i tuoluokuo reiceiba. Taipat ari teik vaicuots, cik apzynuots bejs Kuorsovys lāmums veiduot taišni taidys nūruodis, i kū nūvoda dūmis puorstuovi dareis tuoļuok: pamess zeimis i moksuos struopi, nūjims tuos, tai pagaisynojūt ari iztierātūs leidzekļus, voi īs iz tīsu. Raidejumā teik runuots ar VVC Volūdys kontrolis regionaluos nūdalis vadeituoju Sarmeiti Pāvulēnu, kai ari ar Kuorsovys nūvoda dūmis izpylddirektoru Tuomu Vuorkali.

Taipat raidejums īsaver, kas pasamainejs vīnā nu tematim, kas apsavārts pyrmuok: īsnāgumu raksteišona latgalīšu volūdā. Secynuots, ka pošvaļdeibai ir juopījem īsnāgums latgalīšu volūdā.

Gunta Nagle raidejumā vaicoj, kaidys ir jaunīšu bīdreibu attīceibys ar pošvaļdeibom, kaids ir pošvaļdeibu lobums i kū bīdreibys soka par pošvaļdeibys finansialu paleidzeibu.

Par cyta veida atkareibom Vuordineicā runoj Arņs Slobožanins i Valentins Lukaševičs.

Raidejumu klausīs ite.