Marta vydā albumu izdavuse jauna, nu reizē jau pīredziejuse apvīneiba – “Brāļi un māsas”. Jauna aiz tuo, ka itys ir jūs pyrmais albums i pyrmuo leluokuo publiskuo pasaruodeišona, nu pīredziejuse aiz tuo, ka tymā apsavīnuojuši Latvejā pazeistami muziki.

Projektā “Brāļi un māsas” spielej Artis Orubs, Ilze Grunte, Andris Grunte i Latgolai “sovejī”, cytūs zynomūs projektūs dzierdētī Edgars Kārlis i Kristīne Kārkle. Kai Ilze i Andris, tai Kristīne i Edgars ir bruoļs i muosa, kurī kūpā muzicej jau nu mozu dīnu, deļ tuo ari logiskys ir projekta nūsaukums. Taipat vysu vydā breineigi īsadar ari Artis, kurs ir kai izcyls muzikis tai ari cīši lobs draugs.

Apvīneiba par itaidu sastuovu i saimis saitem soka, ka “tei vysod ir eipaša sajiuta muzicēt kūpā ar cylvākim, kurūs jiuti, mīļoj, ar kurim var sasarunuot bez vuordu – muzykys volūdā!”

Jaunajā albumā “Divējādi” vydā ir 10 dzīšmu, nu kurūs treis izskaņ latgaliski. Albums ir taiseits, pīsaturūt pi lobuokūs modernuo eklektisma tradiceju, ar stuostu par sīvītis myužu nu dzimšonys da pādejuos myuža dīnys, par pamatu jemūt tautysdzīšmu originalūs tekstus i melodejis, bet kluotyn dalīkūt sovu muzykalū pīredzi i redziejumu. Latvīšu tautysdzīšmu tradiceja mejās ar pasauļa muzyku – dzierdeiguokuos auss albumā sadzierdēs kai armeņu kora dzīduojumus, tai Alpu viersyuņu arejis, tai i Amazonis myužamežu, Indejis plašumu i zemnīku dzerauņu nūskanis.

Albums īraksteits “Sound Division Studios”, bet izdūšonu pabaļstejs Vaļsts kulturkapitala fonds. Izdeviejs – muzykys izdevnīceiba “Plate”. Albumu var nūpierkt Latgolys Studentu centra gruomotu goldā, veikalā “O! Marta” Daugovpilī, tautys muzykys salonā “Upe” i folkklubā “Ala Pagrabs” Reigā. Taipat albumu var nūpierkt škārsteikla veikalā “Taiseits Latgolā” ite.

Albuma dzīšmu saroksts:
1. Neviens putniņš tā nepūta
2. Sajāja bramaņi
3. Gon dzaltona kļavys lopa
4. Viena pati es māsiņa
5. Ai Dieviņi, augstu saule
6. Gulēja saulīte ābeļu dārzā
7. Kyukova dzagiuze
8. Arit, arit bruoleleni
9. Velc, pelīte, bērnam miegu
10. Divējādi saule tek