Svātdiņ, 24. julī, Lūznovys muižys parkā nūtiks pyrmais Muokslys pikniks – muokslu i garšu festivals, kurymā aicynuoti puļcētīs muokslys baudeituoji, sajiutu gordieži i eipašūs šaļteņu kolekcionari, kab ar muzykys, muokslys, dejis, garšu i cytom baudom pīdzeivuotu muokslys radeišonys šaļti, informej Lūznovys muižys kulturys projektu vadeituoja Inga Drele.

Muokslys piknika laikā nu 13.00 da 23.00 Lūznovys muižā i tuos parkā byus pīdzeivuojamys radzamys, dzierdamys i garšojamys baudys. Par muzykalū daļu pasaryupēs “Dzelzs Vilks”, “Pieneņu vīns”, “Coco’nuts”, Haralds Sīmanis, Elizabete Lāce, Liene Narciss, “The Jokers Juniors”, “Wierd Wednesday”, “JahBahus Trio”, nu vysaiduos vītuos parka teritorejā byus apsaverami: improvizacejis teatra “18PLUS” improvizacejis humoršovs, laikmeteiguos dejis izruodis “Bez vadiem”, “Ekskursija” i “Dunkani – dīvaiņi vai pravieši?”, kim? Laikmeteiguos muokslys centra producātūs muokslinīku video/kinu programa, Reigys Storptautyskuo kinu festivala “2ANNAS” eiskinu programa, māmuo kina, vidis instalacejis, gaismys objektu i muokslys izstuodis, guņs skulptura. Par gastronomiskajim puorsteigumim pasaryupēs i vītejī, i uorzemu povori, organizātuos meistarklasēs eksperimentejūt na viņ ar iedīņa garšu, nu ari ar kulinarejā daīmamom kruosom i teksturom. Taipat kotrys nu pasuokuma gostu aicynuots iz pikniku leidza jimt sovu pīpiļdeitū piknika grūzu, kū varēs baudeit tam eipaši paradzātuos vītuos.

Baudeit Muokslys pikniku aicynuoti ari mozuokī muokslys meiļuotuoji, kurīm nu 13.00 da 15.00 paradzāta eipaša pasuokumu programa ar vareibu aktivi dorbuotīs rodūšajuos meistardarbneicuos – veit vaiņukus, aprūcis, līt svecis, kai ari pošim ar ūtu radeit sovu muokslys šedevru.

Muokslys piknika ideja ir savīnuot vysaidys jūmys i disciplinys, paruodūt, ka nav juobyut profesionalam muokslinīkam, kab varātu sev apleik atkluot i nūviertēt skaistū, partū iz pasuokumu aicynuots sevkurs, kas lobā kompanejā gryb sajimt muzykalu, vizualu i gastronomisku prīcu. Dūma par Muokslys pikniku Lūznovys “Mūzā” rodusēs, savīnojūt te dzeivojūšū Mūzu, īdvasmu i atjaunuotuos muižys muokslys izpausmem pīmāruotū infrastrukturu.

Īīšonys moksa Muokslys piknikā ir 2 eiro, beleti īprīkšpuordūšonā nūpierkami “Biļešu Paradīze” kasēs i škārsteiklā, kai ari iz vītys pasuokuma nūtikšonys dīnā.