Nikodema Rancāna bolvys sajiemiejs – Imants Slišāns
Paguojušuo goda 13. septembrī nūtyka pyrmais Nikodema Rancāna konkursa izcyluokajim Latgolys regiona školuotuojim nūslāguma pasuokums. Tymā tyka gūdynuoti vysi nominanti, bet eipašuos bolvys – sudobra pakovsaktys – izapeļneja 9 Latgolys pedagogi, vīns nu jūs nominacejā “Par īguļdejumu un sasnāgumim latgalīšu volūdys, kulturviesturis un nūvoda vuiceibys īvīsšonā un īdzeivynuošonā školys vuiceibu vidē” Baļtinovys vydsškolys direktors Imants Slišāns.
Kai ir izadevs ituo vuiceibu goda laikā “kolpuot” nominacejis pamatidejai?
Juosoka, ka, byudams školys direktors, es turpynoju jau godim īsuoktuos tradicejis. Par sovu pamataizdavumu pīzeistu tū, ka ir juopanuok, lai latgalīšu volūdai ir vīta školā. Baļtinovys vydsškolā pasuokumūs – Žetonu vokorā, izlaidumūs, cytūs svineigūs pasuokumūs skaņ ari latgalīšu volūda. Ari sovys uzrunys soku latgaliski, lai školys bārni i gosti pīrūn, ka tei ir normala prakse, ka volūda skaņ ari oficialajūs pasuokumūs školā.
Jiutu gondarejumu, ka jau ūtrū godu septeituos klasis školānim teik vuiceita nūvodmuoceiba, školuotuoja Inta Ludbuorža ir tei, kas guodoj par ituo prīškmata pasnīgšonu. Nūvodmuoceibu 7. klase apgiust, ari braucūt ekskursejuos pa Latgolu i senejom latgaļu vītom. Juosoka paļdis školuotuojai I. Ludbuoržai, kas jau ūtrū godu piec kuortys roksta projektu Vītolu fondam i daboj finansiejumu muoceibu ekskursejom.
Kai kotru godu, ari šūgod baļtinovīšu komandu vežu iz Latgalīšu volūdys, literaturys i kulturviesturis olimpiadi, palykom trešī, partū maņ lela prīca, ka interese par latgaliskū jiutama myusu vydsškolānūs.
Kotru godu 12. klasis absolventim izlaidumā nu školys duovynojam gruomotys par Latgolu, kū myusim saryupej Pīters Keišs nu Rēzeknis (Baļtinovys vydsškolys absolvents). Šūgod izlaidumā absolventi “ceļamaizei” sajēme Mikeļa Bukša “Latgaļu atmūdu” voi Ontona Rupaiņa “Māra mostas”. Ceru, ka vysmoz ar godim, ja na tān, jī kotrs saprass, kaida tei ir vierteiba!
Kai Tev redzīs, voi taida bolva ir vajadzeiga i cik nūzeimeiga jei ir Tovā dzeivē?
Bolva nūteikti ir vajadzeiga i maņ pošam tei ir cīš svareiga atzineiba. Cīš svareigi, ka pasuokums nūtyka Rēzeknē, tūlaik vēļ Rēzeknis Augstškolā, ka vyss suocēs pi Nikodema Rancāna pīminekļa i ka vyss nūtyka latgaliski. Ite paļdis juosoka Ilgai Šuplinskai i cytim organizatorim. Var tikai izsaceit cereibu, ka konkurss turpynosīs ari šūgod.
Dasaceit školuotuojus Nikodema Rancāna konkursam var da 5. septembra, nūslāguma pasuokums nūtiks 25. septembrī Ludzys Kulturys nomā. Konkursu organizej Latgalīšu Kulturys bīdreiba sadarbeibā ar Rēzeknis Tehnologeju akademeju, Kulturys ministreju, Rēzeknis, Ludzys, Preiļu i Aglyunys nūvoda pošvaļdeibom.
Vaira informacejis i konkursa nūlykums
Ilga Šuplinska, konkursa koordinatore
