12. julī Rēzeknē dorbu suoce Latvejis Radejis (LR) Latgolys multimedeju studeja, kas izveiduota Nacionaluos elektroniskūs plošsazinis leidzekļu padūmis (NEPLP) “Latgales elektronisko mediju programmas” ītvorūs. Studejis aizdavums ir nūdrūsynuot regionaluos informaceis plyusmu vysuos LR programuos, veiduot saturu portalam LSM.lv, kai ari nuokūtnē atteisteit kūpprojektus ar Latvejis Televizeju (LTV). Rēzeknis studejis darbeibai Saeimys Budžeta i finanšu (nūdūkļu) komiseja pīškeira finansiejumu 155 tyukstūšu eiro apmārā.

LR studeja kolpoj tam, kab pīrūbežā dzeivojūšī Latvejis dzeivuotuoji pastyprynuoti teik informāti par vaļstī nūteikūšajim procesim i storptautyskūs nūtikšonu atteisteibu. Studeja ir prīšknūsacejums tam, kab palelynuotu sabīdryskūs medeju auditoreju Latgolā, kai ari styprynuotu latgalīšu ideņtitati i volūdu.

Studejis atkluošonys pasuokumā pīsadaleja NEPLP lūcekli, vītejūs pošvaļdeibu puorstuovi i Latgolys kulturys darbinīki. Atkluošonys pasuokuma ītvorūs LR1 raidejumā “Pēcpusdiena” Renāte Lazdiņa i Dzintris Kolāts vadeja diskuseju par stereotipim, kas saisteiti ar Latgolu.

Latgolys multimedeju studeja itūšaļt jau veidoj ziņu materialus LR1 i LR4 ziņu izlaidumim. Dreiži planavuoti eipaši īroksti ari LR3 – Klasika programai, kai ari atseviškim raidejumim cytuos programuos, kurymuos ītvarta Latgolys tematika vysvysaiduos interešu jūmuos.