Ludzys nūvoda pošvaļdeiba izsludynuojuse konkursu “Ludzas novada himna”, kuruo mierkis ir radeit Ludzys nūvoda himnu, kas veicynuotu lokalpatriotismu, nūvoda vīnuoteibu i atpazeistameibu, informej Ludzys nūvoda sātyslopa.

Konkursā var pīsadaleit sevkurs Ludzys nūvoda i Latvejis dzeivuotuojs, īsnādzūt himnys demo verseju CD formatā, nūts ar vuordim i himnys tekstu da ituo gods 29. decembra Ludzys nūvoda pošvaļdeibā, Raiņa īlā 16, Ludzā. Konkursam īsyuteitūs dorbus žureja izviertēs da 2017. goda 23. janvara i izlaseis dorbus, kurūs nūdūt tautys bolsuošonai Ludzys nūvoda pošvaļdeibys sātyslopā i pošvaļdeibys informativajā izdavumā “Ludzas Novada Vēstis”. Ka īsnīgtī dorbi byus gona augstvierteigi, atbylstūšuokais sajims Ludzys nūvoda himnys statusu. Treis veiksmeiguokī pretendenti tiks apbolvuoti ar Ludzys nūvoda pošvaļdeibys Pateiceibys rokstim i naudys premeju: 700 eiro sajims konkursa uzvarātuojs, 200 eiro i 100 eiro – diveju cytu lobuokūs dorbu īsnīdzieji.