Škilbānu etnografiskajam ansambļam tūp videoklips
Juļa beiguos eipaša šaļts beja Škilbānu etnografiskuo ansambļa dzeivē – tyka filmāts pyrmais etnografiskuo ansambļa videoklips, kuruo mierkis ir īmyužynuot ansambļa dzīduotuojis. Videoklips tūp dzīsmei, ar kurū suocīs ansamblis – “Es apsieju lynu dryvu”.
Videoklipa filmiešona nūtyka 28. julī Rekovā, i tamā pīsadaleja vysys ansambļa ituos šaļts dzīduotuojis. Dzīsmis “Es apsieju lynu dryvu” video versejā tiks īmyužynuotys div dzīsmis versejis – i viesturiskais Latvejis Folklorys kruotivis īroksts ar dzīsmis teiciejis Rozalejis Slišānes pīsadaleišonu, i pārņ Balkanu dobys parkā īraksteitais ituos šaļts ansambļa dzīduotuoju dzīduotais variants, tai gūdynojūt vysu ansambļa darbeibys gaitu.
Škilbānu etnografiskuo ansambļa klipu veidoj studeja “3 karotes medus”, kurī veiduojuši daudzys latgalīšu muziku dzīšmu video versejis, taipat raidejumu cyklu “Sajūti Latgali!” i latgalīšu volūdys apvuiceibu video versejis. Ansambļa dzīduotuojom filmiešonuos beja jauna pīredze, ar kurū sīvys cīši labi i raitai tyka golā, viereigi sekojūt ari filmiešonys komandys nūruodem.
Videoklips par Zīmeļlatgolys dzīduotuojom tūp projektā “Ziemeļlatgales tradicionālās dziedāšanas godināšanas svētki “Dzīdat, meitas, kū gadait!””, ar kuruo kulminaceju ituo gods 3. decembrī Rekovā tiks svieteiti Zīmeļlatgolys tradicionaluos dzīduošonys svātki – i videoklipa prezentaceja, i Škilbānu etnografiskuo ansambļa 35 godu jubilejs, i Zīmeļlatgolys dzīduotuoju sasatikšona i ari izdavuma “Škilbanu sīvas” izdūšona. Videoklipa radeišonu atbolsta Latgolys kulturys programa – Vaļsts kulturkapitala fonds i Latgolys Regiona atteisteibys agentura.
Teksta i karteņu autore: Edeite Husare
