Itūgod nūteik jau ūtruo Jezupa Pīguožņa bolvys Latvejis ainovu gleznīceibā konkursa izstuode, kurei pavasarī beja apsaverama Reigys Svātuo Pītera bazneicā, tod Jākubpiļs Viesturis muzejā, nu Jezupa Pīguožņa dzimšonys dīnā – 15. septembrī izstuode, sadaleita div daļuos, reizē tiks atkluota Preiļu viesturis i lītiškuos muokslys muzejā i Latgolys Kulturviesturis muzejā Rēzeknē, informej Īva Pīguozne. Izstuodē kūpā pīsadola 62 muokslinīku 82 dorbi. Tei ir skaitliski leluokuo, stilistiski plaša i profesionali augstvierteiga gleznu paruode, kas dūd vareibu skateituojim īsapazeit ar Latvejis muokslinīku ainovu žanrā padareitū goda laikā. Izstuode byus apsaverama da 12. novembra.

Preiļu viesturis i lītiškuos muokslys muzejā 17. septembrī 14.00 byus Jezupa Pīguožņa bolvys “Par labāko Latvijas ainavu glezniecībā” padūšonys ceremoneja, kurā nu treis žurejis izvierzeitūs nominantu tiks apduovuots golvonuos bolvys sajiemiejs. Bolvys sajiemiejs tiks pi Juoņa Strupuļa veiduotuos zalta medalis i Preiļu nūvoda dūmis pīškiertuos naudys bolvys 3000 eiro apmārā.

Preiļūs nūtiks ari ūtrais Jezupa Pīguožņa vuordā nūsauktais muokslinīku pleners. Tys nūtiks Jezupa Pīguožņa dzimšonys dīnys nedeļā – laikā nu 12. septembra da 16. septembra. Plenerā pīsadaleis 20 muokslinīku, tymā skaitā bolvys nominanti. Itūgod plenerā, piec Juoņa Streiča īrūsynuojuma, ir jaunynuojums. Vīnu dīnu kotrys muokslinīks pavadeis gleznojūt kūpā ar kaidu nu Preiļu muzykys i muokslys školys jaunajim talantim, nadaudz jim atkluojūt gleznīceibys omota nūslāpumus. 17. septembrī nūtiks plenera dorbu ekspresizstuode, tok ilguokai apsavieršonai plenera dorbi tiks eksponāti nu 20. decembra da 2017. goda 12. februara.

Jezupa Pīguožņa bolva Latvejis ainovu gleznīceibā tyka īdybynuota 2015. gadā, sasadorbojūt Preiļu nūvoda pošvaļdeibai, Reigys dūmei i Latvejā zynomim muokslinīkim, kab gleznīceibā turpynuotu atteisteit i popularizēt Latvejis ainovu, kai ari vīnuotu Latvejis golvyspiļsātys i nūvodu kulturys procesus. Iz prīšku bolvu paradzāts pīškiert kotru godu.