Sovvaļnīks atsagrīž ar jaunu albumu “Napaseitynuots”, kai ari reizē pīduovoj klauseituojim jaunu dzīsmi “Solts”.

Sovvaļnīka jaunuo dzīsme “Solts” klauseituojim pīduovoj smognieju, nu na smeļdzeigi dramatisku stuostu par attīceibu beigom i koč kuo jauna nūjaušamū suokumu. Nu tai, kai dzeivē – solts dyurīņs taišni vyssuopeiguokajā vītā.

Kūpā ar itū dzīsmi 1. decembrī teik atzeimuota ari jaunuo albuma “Napaseitynuots” izīšona. Albums ir veļteits izcylai latgalīšu dzejneicai Annai Rancānei. Dzīsmis īraksteitys sadarbeibā ar Latvejā zynomim skaņu režisorim Gintu Lundbergu, Māri Brensonu, Eināru Lipski i Gintu Stankeviču. Īrokstā pīsadola Sovvaļnīka grupys bīdri – Māris Lovniks (gitara), Artūrs Meļnikovs (bass) i Vadims Meļuščenkovs (bungys), kai ari vairuoki gosti – Kaspars Tobis, Māris Muktupāvels, Biruta Ozoliņa, Guntra Kuzmina, Mareks Gusāns, Pīters Daugulis.

Juoatguodynoj, ka īprīkšejais Sovvaļnīka albums “Bolts susātivs” beja veļteits zynomajam latgalīšu dzejnīkam Ontonam Kūkuojam i izguoja 2010. goda beiguos.