Viesturnīks Muorteņš Mintaurs “Kolnasātā” stuosta par breinumainu Eiropā zynomu nūtikšonu Rēzeknis bazneicā, kas atsaroduse natuoli nu Rēzeknis piļs. Vosorys svātku sastdīnē ir nūtykuse breinumaina myrušūs augšonceļšonuos. Īīmūt bazneicā, bejuse dzierdama dzīduošona i dīviškeiga muzyka, i konstatāts, ka tī ir ap 30 myrušūs, kurī ir naseņ apglobuoti i augšoncālušīs nu myrūņu, i, kai oculīcinīki stuosta, tī asūt dzīduojuši luteraņu gareiguos dzīsmis.

Viesturneicys Kateržinys Pražkovys publikaceja tulkuota žurnalā “Domuzīme”, i viesturnīks Mintaurs stuosta, kaids spūku stuostam sakars ar bazneicys sasaškeļšonu 16. godu symtā, i skaidroj, ka Livonejis laika Rēzeknis pīminiešona cytur Eiropā ir cīši īspaideigs atkluojums.

Vuordineicā Arņs Slobožanins i Valentins Lukaševičs runoj par stuņdinīku.

Raidejumā atskaņuota ari saruna ar Amerikys latgalīti Pīteri Ragaušu, kas intervāts raidejumā “Pi myusim Latgolā”. Guntai Naglei Ragaušs stuosta par tū, cik moz latgaliski runojūšūs palics ASV, skaidroj, parkū īmīļuojs Latgolu i pīmiņ ari sovus investiceju planus nūvodā.