Nu 15.decembra Ludzā apsaverama unikala latvīšu diasporys muokslys izstuode, kū nu sovys kolekcejis ceļojūšuos izstuodis veidā iz Ludzys Nūvodpietnīceibys muzeju atveds Cēsīs izveiduotais “Pasaules latviešu mākslas centrs” (PLMC), tai veicynojūt uorzemēs radeitys augstvierteigys latvīšu muokslys īsakļaušonu Latvejis kulturtelpā.

Izstuodē radzamī vaira par 10 muokslinīku dorbi kai zīduojumi atceļuojuši nu Amerikys, Australejis, Kanadys, Lelbritanejis, Zvīdrejis i Vuocejis, kur nazkod Ūtruo pasauļa kara rezultatā tykuši latvīšu muokslinīki.

Latgolu izstuodē puorstuov div muokslinīki. Pyrmskara Rēzeknis muokslinīku kūpys bīdrys Juoņs Gailis, kas lelu myuža daļu pavadeja emigracejā ASV, i Juoņs Strods, Čikagys latvīšu muokslinīku kūpā sauciejs i īdvasmuotuojs.

Izstuodē radzams vīns no pyrmajim prof. Augusta Anussa emigracejā Vuocejā radeitajim dorbim, kai ari Laimūņa Mieriņa (Angleja), Juoņa Kalmītes, Girta Puriņa, Voldemara Avena, Annys Hagen-Annusys, (ASV), Juoņa Annusa  (Vuoceja), Niklāva Strunkis (Zvīdreja)  Māra Raudziņa, Juoņa Šēnberga (Australeja) i cytu muokslinīku dorbi.

Kai nūruoda PLMC izstuožu kuratore Dr.art. Lelde Kalmīte: “Izstuode paruoda tik daļu nu daudzškautnainuos diasporys latvīšu muokslys, kas viertiejama pasauļa muokslys nūtikšonu kontekstā.”

PLMC ceļojūšuos izstuodis pādejūs div godu laikā sareikuotys ari Daugovpilī, Kruoslovā i Rēzeknē.

“Pasaules latviešu mākslas centrs” izveiduots i dorbojās Cēsīs ar mierki veicynuot muokslys vierteibu saglobuošonu, kū radejuši Ūtruo pasauļa kara rezultatā Latveju pamatušī latvīšu muokslinīki i uorzemēs dzeivojūšuo jaunuo muokslinīku paaudze.

Izstuode, kas radeita ar Kulturys ministrejis atbolstu, Ludzys Nūvodpietnīceibys muzejā, Kuļneva īlā 2, byus apsaverama da 20. janvara.