Jau kaidu laiku socialajā vītnē “Facebook” latgalīšu vydā īcīneita lopa “Latgaļu vyspasauļa gudreibu olūts”, kurā kotru dīnu skaitami jūki, myusdīneigi ticiejumi i parunys latgalīšu volūdā. Kad dazynuotu kod i parkū radeita itei lopa, raidejuma “Pi myusim Latgolā” veiduotuoji sasatyka ar lopys “Latgaļu vyspasauļa gudreibu olūts” radeituoju Arturu Doniku.

Sovu bierneibu Arturs Doniks pavadejs pi Rāznys azara, nu piečuok puorsaciels iz dzeivi Reigā. Sovā profesionalajā darbeibā jis paspiejs dareit celtnīka, radejis regulātuoja, bārmeņa i krūga apsorga dorbu. Arturam Donikam pīdar ari lela sporta atributikys i zynomu sportistu autografu kolekceja. Itūšaļt paraleli sovim kasdīnys dorbim Arturs Doniks kūpā ar sovim dūmubīdrim popularizej latgalīšu volūdu, uzturūt lopu “Latgaļu vyspasauļa gudreibu alūts” socialajā škārsteikla vītnē “Facebook”. Jis pastreipoj, ka latgaliski juoroksta koč voi ar klaidom, partū ka tik ar volūdys lītuošonu tū var saglobuot. Lopa “Latgaļu vyspasauļa gudreibu olūts” tyka radeita ar mierki popularizēt i saglobuot latgalīšu volūdu, i lītuotuoju vydā ir atzineigi nūvārtāta.

“Tys laikam varēja byut kaids 2012. – 2013. gods, kod es škārsteiklā, “Facebook”, lyku rokstus par viesturi, par volūdu, par tū, kū varēju raksteit pats,” stuosta Arturs Doniks. “Ka mes runojom par pošu suokumu, tod mums varbyut nabeja svareigs tys saturs, nu svareiga volūda, kab tys byutu latgaliski. Tik ar laiku tī materiali aizguoja taidi nūpītnuoki i dziļuoki ci smīkleiguoki. Prūtams, nabeja daudzi tūs aktivūs latgalīšu, kas kū na viņ dareja.”

Lopys “Latgaļu vyspasauļa gudreibu olūts” atteisteišonā Arturs Doniks suoce sasadorbuot ar Sergeju Čakānu i Armandu Muško. Kai izaruod, sasatikšona i īsapazeišona personeigi sekuoja tik godu piec komunikacejis i sadarbeibys suokšonys virtualajā vidē.

Tāpat Arturs Doniks dasoka, ka portalā “Facebook” apsaverama vēļ vīna lopa – “Latgaļu humors i dzeivis gudreibys”. “Mes dorbojamēs, kai prūtam,” soka Arturs Doniks. “Bet gaidom ari jaunuokū paaudzi i jaunuokūs čaļus, kas puorjims tū vysu i dareis tuoļuok.”