Hardroka grupa nu Ludzys “Fenikss” otkon apsavīnuojuse i īrakstejuse deveņdasmytajūs godūs radeitu dzīsmi “Latgolai”.

“Dzīsme, kuruos teksts nese Latvejis atmūdys ideju deveņdasmytūs godu suokuos, sovu aktualitati nav pagaisynuojuse ari myusu dīnuos. Pyrmsvieliešonu laikā daudzim politikim ir juoaizadūmoj, parkū jī balotejās i ari par tū, kū jī dora voi dreižuok nadora. Latvejai otkon vajadzeiga atmūda,” tai par dzīsmis viestejumu soka grupys dalinīki.

Dzīsmis muzykys autors ir grupys liders Aleksandrs Cunskis, bet vuordi jimti nu Marijis Andžānis dzejūļa.

Īrokstā pīsadaleja Viktors Baikovs (bolss), Aleksandrs Cunskis (bolss), Vjačeslavs Pilipovs (gitara), Valērija Satibaldijeva (bolss), Olegs Sivohins (bolss, basgitara), Aleksejs Lisovecs (gitara), Vadims Meljušenkovs (bungys).

Īroksts radeits skaņu īrokstu studejā “Bozova”. Īrokstu producēja Arņs Slobožanins. Miksēja Armands Treilihs.

Grupa piec vaira kai 20 godu puortraukuma otkon koncertēs 5. majā “Latgalīšu volūdys nakts” ītvorūs.